ބަންޑާރަ ނައިބުގެ މަގާމުގައި ހުންނެވި އިބްރާހިމް ރިއްފަތަކީ އަމިއްލަ މަންފާއަށް ދައުލަތަށް ގެއްލުންވާގޮތަށް ސްޓޭންޑު ބަދަލުކުރުމުގެ ތާރީޚެއް އޮތް ބޭފުޅެއްކަމަށް ޑރ މުހައްމަދު މުނައްވަރު ވިދާޅުވެއްޖެއެވެ.
ޑރ މުނައްވަރު މިފަދައިން ވިދާޅުވެފައިވަނީ ޗާގޯސް މައްސަލައިގައި ދައުލަތުގެ ސްޓޭންޑް ބަދަލުވުމާއި ގުޅިގެން ދައުލަތަށް އެއްވެސް ގެއްލުމެއް ނުވާނެކަމަށް ބަންޑާރަ ނައިބުގެ އޮފީހުން ބުނަމުންދާ ބުނުމަށް މިއަދު ބޭއްވި ޕްރެސް ކޮންފަރެންސްގައި ވާހަކަދައްކަވަމުންނެވެ.
ޑރ މުނައްވަރުގެ ވާހަކައިގައި ވަނީ ބަންޑާރަނައިބުގެ މަގާމަށް ވަޑައިގެންނެވުމުގެ ކުރިން ރިއްފަތު ގެ ލޯފާމުން ބަލަމުން ދިޔަ މައްސަލައެއްގައި ކަންކަން ކޮށްފައިވާ ގޮތް ހިއްސާކުރައްވާފައެވެ. ޑރ މުނައްވަރު ވިދާޅުވީ ރިއްފަތުއަށް ބަންޑާރަ ނައިބުގެ މަގާމަށް ވަޑައިގެންނެވިއިރުވެސް އެ މައްސަލަ ކުރިއަށްދާ ކަމަށެވެ.
ބަންޑާރަ ނައިބުގެ މަގާމާއި ރިއްފަތު ހަވާލުކުރެއްވުމަށްފަހު، ދައުލަތުގެ ސްޓޭންޑް ބަދަލުކޮށްފައިވާކަމަށާއި، އެކަމުގެ ސަބަބުން ރިއްފަތުގެ ކްލައިންޓަށް ދައުލަތުން ބޮޑު ބަދަލެއް ދޭން ޖެހުނުކަމަށެވެ.
"ރިއްފަތު އެޓާނީ ޖެނަރެލްކަމުގެ މަގާމާއި ހަވާލުވެފައި ފުރަތަމަ ކުރެއްވި ކަންތައްތަކުގެ ތެރެއިން އެއްކަމަކީ އެބޭފުޅާއާއި އެބޭފުޅާގެ ރަހުމަތްތެރި އެހެން ބޭފުޅަކާއި ހައްދަވައިގެން އުޅުއްވާ ލޯފާމަކުން ދައުލަތާއި ދެކޮޅަށް މައްސަލައެއް ގެންގުޅުނު. މައްސަލައަކީ މިތާ ސިނގިރެޓް އިމްޕޯޓުކުރާ ކުންފުންޏަކުން އިމްޕޯޓުކޮށްފައި ހުރި ސިގިރެޓްތަކުން ޑިއުޓީ ބަދަލުވުމުގެ ގަޑި ޖެހުމުގެ ކުރިން ގަނޑި ޖެހުމުގެ ފަހުން ކަހަލަ މައްސަލައެއް، ކަސްޓަމްސްއިން ނިންމެވީ މި ސިގިރެޓް އިމްޕޯޓުކުރެވިފައި ވަނީ ޑިއުޓީ ބޮޑުވި ފަހުންނޭ، ދިވެހި ދައުލަތުގެ ހުރިހާ މުއައްސަސާއަކުން އޭޖީ އޮފީހުންވެސް އެ ގޮތަށް ގަބޫލުކުރައްވާއިން އެ ގޮތަށް ކުރިއަށް ގެންދަވަނިކޮށް، މައްސަލައިގައި އެއްކޮޅުން ރިއްފަތުގެ ލޯފާމު، އަނެއްކޮޅުގައި ދައުލަތް ތިއްބައި އެޓާނީ ޖެނެރަލްގެ މަގާމު ލިބުނީ ދައުލަތުގެ ޕޮސިޝަން ބަދަލުކުރީ އެއީ ގޯސްކޮށް ނަގާފައި އޮތް ޓެކްސްއެކޭ، އެހެންވީމަ އެ އަނބުރާ ދޭށޭ ޖެހޭނީ. ބައްލަވާ މި މީހުންގެ ކްލައިންޓަށް ފައިސާ ދިނީ، ކަސްޓަމްސްގައި ތިއްބެވި ބޭފުޅުން ރޮއިފަ އެ ފައިސާދެއްވީ"
ޑރ މުހައްމަދު މުނައްވަރު
ޑރ މުވައްވަރު ވިދާޅުވީ ރިއްފަތު ދައުލަތުގެ ސްޓޭންޑް ބަދަލުކުރީ ދައުލަތުގެ މަންފާވާ ގޮތަށް ކަމަށް ވިދާޅުވުން ގަބޫލުނުކުރެވޭކަމަށެވެ. އެއީ ރިއްފަތަކީ މާޒީގައި އަމިއްލަ މަންފާއަށް ދައުލަތުގެ ސްޓޭންޑް ބަދަލުކޮށްފައިވާ ބޭފުޅަކަށް ވާތީކަމަށް ޑރ މުނައްވަރު ވިދާޅުވިއެވެ.
ރިއްފަތު މަގާމާއި ހަވާލުވެވަޑައިގެން އެންމެ ފުރަތަމަވެސް ދައުލަތުން ނިންމާފައި އޮތް ކަމެއްގެ ސްޓޭންޑް ބަދަލުކުރީ އޭނާގެ ލޯ ފާމަށް ބޮޑު މަންފާއެއް ވާ ގޮތައްކަމީ މިހާރުވެސް ފެންނަން އޮތް ހަގީގަތްކަމަށް ޑރ މުނައްވަރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
