ކުރިން ފިޝަރީޒް މިނިސްޓަރުކަމާއި ޓޫރިޒަމް މިނިސްޓަރުކަން ކުރެއްވި ހަސަން ސޯބިރަށް ނިޝާން އިއްޒުއްދީނުގެ އިއްޒަތުގެ ވެރިކަމުގެ ލަގަބު އަރުވައިފިއެވެ.

ހަސަން ސޯބިރަށް އިއްޒަތުގެ ވެރިކަމުގެ ލަގަބް އަރުވާފައިވަނީ މިނިވަންދުވަހުގެ ރަސްމީ ޖަލްސާގައެވެ. އާއިލާގެ ފަރާތުން ލަގަބާ ހަވާލުވެ ވަޑައިގެންނެވީ ހަސަން ސާބިރުގެ ދަރިކަނބަލުން އާއިޝަތު ރާނިއާ އެވެ.

ޙަސަން ޞާބިރަށް އިއްޒުއްދީނުގެ އިއްޒަތުގެ ވެރިކަމުގެ ލަގަބުގެ ވެރިކަން އެރުވުމަށް ރައީސުލްޖުމްހޫރިއްޔާ ކަނޑައެޅުއްވީ ރާއްޖޭގެ ތަރައްޤީގެ މަޝްރޫޢުތައް ރޭއްވުމުގައްޔާއި، ރާއްޖޭގެ އިޤްތިޞާދީ ދާއިރާއަށް ޚާއްޞަކޮށް މަސްވެރިކަމުގެ ދާއިރާއާއި ފަތުރުވެރިކަމުގެ ދާއިރާގެ ވަޒީރުކަމުގެ މަޤާމުގައި ހުންނަވައިގެން އެ ދާއިރާތަކުގެ ޞިނާޢަތު ކުރިއެރުވުމަށްޓަކައި ޤައުމީ މުހިންމު މަސައްކަތް ޕުޅުތަކެއް ކުރައްވާފައިވާތީއެވެ. މީގެ އިތުރުން ޚާރިޖީ ދާއިރާއިން ކުރައްވާފައިވާ ޚިދުމަތްތަކުގެ އަގު ވަޒަންކުރެއްވުމުގެ ގޮތުންނެވެ.

ޚާއްޞަ ގޮތެއްގައި ޙަސަން ޞާބިރު ފާހަގަވެގެން ގޮސްފައިވަނީ ދިވެހި ޤައުމުގެ އިޤްތިޞާދާ ބެހޭ ހުރިހާ ދާއިރާއެއްގައި ދިގު މުއްދަތެއް ވަންދެން ޚިދުމަތް ކުރެއްވި ބޭފުޅެއްގެ ގޮތުގައެވެ. އެ ދާއިރާތަކުގެ ތެރޭގައި ފަތުރުވެރިކަމާއި މަސްވެރިކަމާއި ދަނޑުވެރިކަން ހިމެނެއެވެ. އަދި ރާއްޖޭގެ ތަރައްޤީގެ މަޝްރޫޢުތައް ރޭވެވުމާއި ހިންގެވުމުގައިވެސް އެމަނިކުފާނަކީ ފާހަގަކޮށްލެވޭ ބޭފުޅެކެވެ.

ހަސަން ސޯބިރުގެ މޭސްތިރިކަމުގެ ދަށުން ގއ ކޫއްޑޫގައި މަސްވެރިކަމުގެ އިންވެސްޓްމަންޓްތައް ފެށިގެންދިޔައިރު، ބޯހިމެނުން ފެށުމުގައި އެމަނިކްފާނު އަދާކުރައްވާފައިވާ ދައުރު ފާހަގަކޮށްލެވެއެވެ.