ދިވެހިރާއްޖޭގެ ޤައުމީ އެއާލައިން، މޯލްޑިވިއަންގެ ދަތުރުތަކުގައި ރޭ ހުޅުވި އައު ޓާމިނަލް ބޭނުންކުރަން މިއަދު ފަށައިފިއެވެ.

އައުޓާމިނަލް ބޭނުންކުރަން ފެށުމުގެ ގޮތުން މޯލްޑިވިއަންގެ ކެބިން ކްރޫއިން ބޭނުންކުރާނީ ދިވެހި ހެދުމެވެ.

އައު ޓާމިނަލް އެންމެ ފުރަތަމަ ބޭނުންކުރުމަށް ނިންމާފައިވަނީ މޯލްޑިވިއަންގެ އެއާބަސް އޭ330 ބޯޓެވެ. އެގޮތުން އާ ޓާމިނަލުން ފުރަތަމަ ހިދުމަތްދޭނީ މިއަދު  ކޮޗިންއިން ފްރައިގެން އަންނަ ބޯޓަށެވެ. އެ ފްލައިޓް ވެލާނާ އިންޓަރނޭޝަނަލް އެއާޕޯޓަށް ޖައްސާދީ މެންދުރުފަހު 14:00 ގައެވެ.

މޯލްޑިވިއަނުން މިއަދު އައު ޓާމިނަލް ބޭނުންކުރަން ފަށާއިރު، ކުރިއަށްއޮތް ސެޕްޓެމްބަރުމަހުގެ ތެރޭގައި އިތުރު އެއާލައިންތަކަށް އައު ޓާމިނަލް ހުޅުވާލާނޭކަމަށް އެމްއޭސީއެލުން ވަނީ ބުނެފައެވެ. އެގޮތުން ރާއްޖެއަށް އުދުހޭ 34 އެއާލައިނަކުން އައު ޓާމިނަލް ބޭނުންކުރަން ފަށާނޭކަމަށް އެމްއޭސީއެލުން ބުނެއެވެ.

ރާއްޖޭގެ މައި ވައިގެ ބަނދަރުގެ އައު ޓާމިނަލްގެ ހިދުމަތް ފަށާފައިވަނީ ދުނިޔޭގެ އެންމެ ޒަމާނީ އެއާޕޯޓްތަކުގެ ޓާމިނަލްތަކުގައި ހުންނަ ވަސީލަތްތަކާއެކުގައެވެ. 

- ފުރާ މީހުން އަމިއްލައަށް ޗެކިންވުމަށް 47 ކައުންޓަރު

- ސެލްފް ޗެކިން ހަ ކިއޯސްކް

- އިމިގްރޭޝަން ކްލިއަރ ކުރުމަށް 20 ކައުންޓަރު

- 28 އެރައިވަލް އިމިގްރޭޝަން ކައުންޓަރު

- ފަސް ބެގޭޖް ކްލެއިމް ބެލްޓް

- 6 ފަސެންޖަރ ބޯޑިން ގޭޓް

ކުލަގަދަ ރަސްމިއްޔާތަކާއެކު އައު ޓާމިނަލް ހުޅުވާފައިވަނީ މިނިވަންދުވަހާ ދިމާކޮށް ރޭ ބޭއްވި ހައްސަ ހަފްލާއެއްގައެވެ. އައު ޓާމިނަލް ތަރައްޤީކުރުމަށް 5 ބިލިއަން ރުފިޔާ ހޭދަވިއިރު، އެ ޓާމިނަލުން އަހަރެއްގެ މައްޗަށް 7.5 މިލިއަން ދަތުރުވެރިންނަށް ހިދުމަތް ދެވޭނޭކަމަށް އެމްއޭސީއެލުން ވަނީ ބުނެފައެވެ.