ފުލުހުންގެ ބެލުމުގެ ދަށުގައި ހުއްޓ ނިޔާވި މީހާގެ އޮޓޮޕްސީ ހެދުމަށް ނިންމާފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ފުލުހުންގެ ބެލުމުގެ ދަށަށް ގެންދިޔަ މީހެއްގެ މެއަށް ތަދެއް އަރައި، ފިޓު ޖެހުން ފަދަ އަލާމާތްތަކެއް ފެނުމުން އޭނާ މަޑަވެލި ހެލްތު ސެންޓަރަށް ގެންދިޔަ ކަމަށެވެ.
އެމީހާ މަޑަވެލި ހެލްތު ސެންޓަރަށް ގެންދިޔަ އިރުވެސް ނިޔާވެފައިވާ ކަމަށް އޭނާ ބެއްލެވި ޑޮކްޓަރު ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެއެވެ. ނިޔާވެފައިވަނީ އުމުުރުން 43 އަހަރުގެ ދިވެހި ފިރިހެނެކެވެ. އެމީހާއަކީ ހޯޑެއްދޫއަށް ނިސްބަތްވާ މީހެކެވެ.
ފުލުހުން ބުނީ އެ ހާދިސާއާ ބެހޭ މައުލޫމާތު ނެޝަނަލް އިންޓަގްރިޓީ ކޮމިޝަނަށާއި ހިއުމަން ރައިޓްސް ކޮމިޝަނާ ހިއްސާކޮށް، ތަހުގީގު ކުރުމަށް އެދިފައިވާ ކަމަށެވެ.
މަޑަވެލީން ވާހަކަ ދެއްކާ ބައެއް މީހުން ފުލުހުންގެ މި ވާހަކަތައް ދޮގުކުރާއިރު، ބައެއް މީހުން ބުނާ ގޮތުގައި ފުލުހުން ވަނީ އޭނާއަށް އަނިޔާކޮށްފައެވެ.
އެކަމާއި ގުޅޭ ގޮތުން ފުލުހުން ބުނީ، އެ ފިރިހެން މީހާ، ފުލުހުންގެ ބެލުމުގެ ދަށުން ގެންގޮސްފައިވަނީ ކުއްޔަށް ހިފާފައިވާ ލޯންޗެއްގައި ކަމަށާ، އެ ލޯންޗުގައި އާއްމުންވެސް ތިބި ކަމަށެވެ.
އަދި އެ ނިޔާވި މީހާގެ މަރުގެ ސަބަބު ދެނެގަތުމަށްޓަކައި އޮޓޮޕްސީ ހެދުމަށް ނިންމާފައިވާ ކަމަށްވެސް ފުލުހުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
