އ.ދ.ގެ މެންބަރުކަން ހޯދުމަށް ފަލަސްޠީނުން ކުރަމުންދާ މަސައްކަތްތަކަށް ޢަރަބި ޤައުމުގެ އެއްބާރުލުމާއި އެހީތެރިކަން އިހުނަށްވުރެ ބޮޑަށް ބޭނުންވެފައިވާ ކަމަށް ފަލަސްޠީނުގެ ރައީސް މަޙްމޫދު އައްބާސް ވިދާޅުވެއްޖެެއެވެ.
އަލްޖީރިޔާގައި ކުރިއަށްދިޔަ ޢަރަބި ލީގުގެ ސަމިޓުގައި ވާހަކަފުޅު ދައްކަވަމުން މަހްމޫދު އައްބާސް ވިދާޅުވީ، ފަލަސްޠީނުގެ ރައްޔިތުން ޔަހޫދީންގެ އަޅުވެތި ކަމުގެ ދަށުގައި ދިރިއުޅޭތާ މިހާރު 74 އަހަރު ވެފައިވާ ކަމަށް ވިދާޅުވެފައެވެ.
"ބައިނަލްއަޤުވާމީ މުޖުތަމަޢުގެ ނިންމުންތަކަށް ފަލަސްޠީނުގެ ރައްޔިތުން އިޙުތިރާމު ކުރޭ. ނަމަވެސް، އިސްރާޢީލުން އެ ދަނީ ދެ ދަޢުލަތް ޤާއިމު ކުރުމަށް ދެކޮޅު ހަދަމުން. އެ ކަމަށް ހުރަސް އަޅަމުން. ބައިނަލްއަޤުވާމީ ޤާނޫނުތައް މުގުރަމުން،" އައްބާސް ވިދާޅުވިއެވެ.
މިއާއެކު އައްބާސް ވިދާޅުވީ، އަދި އަދަށްވެސް ފަލަސްޠީނުގެ ރައްޔިތުންގެ ބިންތަކަށް ވެރިވެގަތުމަށް ޔަހޫދީން ހިންގަމުންދާ އަމަލުތަކަށް ހުއްޓާލާފައި ނުވާކަން ފާހަގަކޮށް އޭގެ ސަބަބުން ފަލަސްޠީނުގެ ރައްޔިތުންނަށް ކުރިމަތިވަމުންދާ ބިރުވެރިކަމާއި އަޅުވެތިކަމަށް ނިމުމެއް ނެތް ކަމުގައި ވިދާޅުވެފައެވެ. ވުމާއެކު އެކަން ނިމުމަކަށް ގެނައުމަށް އދ. މެންބަރުކަން ބޭނުންވާއިރު އެކަން ވާން އޮތީ އަރަބި ގައުމު ތަކުގެ އެހީ އިތުރަށް ލިބިގެން ކަމަށްވެސް އައްބާސް ފާހަގަކުރެއްވިއެވެ.
"ފަލަސްޠީނަށް އ.ދ.ގެ މެންބަރު ކަން ލިބެން އޮތީ ޢަރަބި ލީގުގެ މެންބަރު ޤައުމުތަކުގެ އެއްބާރުލުމާއި އެހީތެރިކަމާ އެކު،" އައްބާސް ވިދާޅުވިއެވެ.
މި ސަމިޓުގައި ވާހަކަ ދައްކަވަމުން އަރަބި ގައުމުތަކުންވަނީ އައްބާސްގެ އެ ވާހަކަތަކަށް ތާއީދު ކުރައްވައި ވާހަކަ ދައްކަވާފައެވެ. އެގޮތުން މިޞްރުގެ ރައީސް ޢަބްދުލް ފައްތާޙް އަލްސީސީ ވެސް ވަނީ ފަލަސްތީނަށް މިނިވަންކަން ހޯދުމަށް ޤައުމުތައް ގުޅިގެން މަސައްކަތް ކުރުމަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
