ވޯލްޑްކަމާއި ދިމާކޮށް ރާއްޖޭގައި ހިންގާ ވަކި ޓީވީ ޗެނަލަކަށް ފައިސާ ހޯދުމަށް "ބޭފުޅަކު" ރައްޔިތުންގެ މަޖިލީހުގެ މެމްބަރުންނަށް ބިރުދައްކަމުން ދާ ކަމަށް މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސެއިން) ތުހުމަތު ކުރައްވައިފިއެވެ. 

އަނދުން ހުސެއިން މިފަދައިން ތުހުމަތު ކުރައްވާފައިވަނީ ރައްޔިތުންގެ މަޖިލީހުގެ 3 ވަނަ ދައުރުގެ 33 ވަނަ ޖަލްސާގައި ވާހަކަދައްކަވަމުންނެވެ. 

އޭނާގެ ވާހަކައިގައި ވަނީ ވޯލްޑްކަޕާއި ދިމާކޮށް ވަކި ބަޔަކަށް މަންފާވާގޮތަށް ރީބްރޯޑްކާސްޓު ކުރުމުގެ ގަވައިދަށް ބްރޯޑްކާސްޓިން ކޮމިޝަނުން އިސްލާހެއް ގެނެސްފައިވާކަން ފާހަގަކޮށްފައެވެ. އެ އިސްލާހު ބަދަލުކުރުވުމަށް ރައްޔިތުންގެ މަޖިލީހުން މިހާރު މަސައްކަތް ފަށާފައިވާކަމަށް އޭނާ ވިދާޅުވިއެވެ. 

އެއާއެކު އަދުން ހުސެއިން ވިދާޅުވީ އެ މަސައްކަތް މަޖިލީހުން ފެއްޓުމާއެކު ވަކި ޓީވީ ޗެނަލަކަށް ނިސްބަތްވާ ބޭފުޅަކު މަޖިލީސް މެމްބަރުންނަށް ބިރުދައްކަމުންދާކަމަށެވެ. އަދި އެގޮތަށް އެކަން ކުރަނީ އެ ޗެނަލަށް ފައިސާ ހޯދުމަށް ކަމަށް އަދުން ހުސެއިން ވަނީ ވިދާޅުވެފައެވެ. 

އަދުން ހުސެއިން ވިދާޅުވީ ރީ-ބްރޯޑްކާސްޓު ކުރުމުގެ ގަވައިދު އިސްލާހުކުރުމުގެ މަސައްކަތް މަޖިލީހުގެ ދެ ކޮމެޓީއެއްގައި ކުރިއަށް ދާކަމަށެވެ. 

އެހެންކަމުން، މި މަސައްކަތް ކުރިއަށް ދާއިރު އެފަދަ ނުފޫޒުތަކާއި ބިރުދެއްކުމުން އެއްކިބާވެ ތިބި، ވަކި ބަޔަކަށް މަންފާ ހޯދައިދިނުމުގެ ބަދަލުގައި އެކަންކަމަށް އެންމެ ގާބިލް ފަރާތްތަކަށް ފުރުސަތު ލިބިގެންދާނެ ގޮތަކަށް އިސްލާހުތައް ގެނައުމަށް މެމްބަރުންނަށް އަނދުން ހުސެއިން ވަނީ ގޮވާލައްވާފައެވެ.

ޤަތަރ ވޯލްޑްކަޕް 2022 ބޯމަތިވެފައިވަނިކޮށް މިދިޔަ ސެޕްޓެންބަރ މަހު 19 ވަނަ ދުވަހު, ބްރޯޑްކާސްޓަރުންނާއި, ރީ ބްރޯޑްކާސްޓަރުންގެ ބެލެނިވެރި މުއައްސަސާ, ބްރޯޑްކާސްޓިން ކޮމިޝަނުން ވަނީ ޤަވައިދަށް ގެނައި ކުއްލި ބަދަލާއެކު ހިލޭ ވޯލްޑްކަޕް ބެލުމުގެ ފުރުސަތު ދިވެހިންނަށް ވަނީ ބަންދުވެފައެވެ.

ދައުލަތުގެ މީޑިއާ އިން މީގެ ކުރިން ހިލޭ ދެއްކި ވޯލްޑް ކަޕްގެ ރައިޓްސް ގަންނަން ޕީއެސްއެމް އިން 333،000 ޑޮލަރު (5.4 މިލިއަން ރުފިޔާ) ވަނީ ހަރަދު ކޮށްފައެވެ.

ދައުލަތުގެ މީޑިއާއަށް ބޮޑު ޚަރަަދެއްކޮށްގެން ރައިޓްސް ގަތީ، ރާއޖެ ޓީވީއިން އެ ރައިޓްސް ގަތްތާ އެތައް ދުވަހެއްފަހުންކަން ފާހަގަކޮށްލެވެއެވެ. އޭރު އެ ހުއްދަ އޮތީ ހަމައެކަނި ރާއްޖެ ޓީވީއާއި އައިސް ޕްލަސްއަށެވެ. ޕީއެސްއެމްއިން ރައިޓްސް ގަތީ ދައުލަތުގެ މީޑިއާ މެދުވެރިކޮށް ވޯލްޑްކަޕް ނުދައްކާ ބޮޑެތި ފާޑުކިޔުންތަކެއް އަމާޒުވުމާއި ގުޅިގެންނެވެ.