އިންޑިއާ މީހުން ކުޑަކުދިންނާ ބެހި ޖިންސީ ގޯނާ ކުރާ މައްސަލަ ހައްދުފަހަނަޅައި ގޮއްސި ކަމަށް ޖަަމިއްޔަތުއްސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ވިދާޅުވެއްޖެެއެވެ.

ފަހަކަށް އައިސް ރާއްޖޭގައި މަސައްކަތް ކުރާ އިންޑިއާ މީހުންނާއި ޓީޗަރުން ކުދި އަންހެން ކުދިންނާއި ފިރިހެން ކުދިންނަށް ޖިންސީ ގޯނާ ކުރާ މައްސަލަ މިވަނީ ވަރަށް ބޮޑަށް އިތުރު ވެފައެވެ. އެގޮތުން މިމަހު ތެރޭގައިވެސް އެފަދަ ދެ ހާދިސާއެއް ވަނީ ފެންމަތިވެފައެވެ. 

އެކަމާއި ގުޅިގެން ކަންބޮޑުވުން ފާޅުކޮށް ޢަލީ ރަމީޒު ކުރެއްވި ޓުވީޓެއްގައި ވިދާޅުވީ، އިންޑިއާ މީހުން ކުޑަކުދިންނާ ބެހުމާއި ޖިންސީ ގޯނާ ކުރުމުގެ މައްސަލަތައް ހައްދުފަހަނަޅާ ގޮސްފައިވާ ކަމަށެވެ. 

ފުލުހުން ބުނެފައިވާ ގޮތުގައި، މިމަހުގެ 1 ވަނަ ދުވަހުގެ ރޭ ސައުތު ޕޮލިސް ރީޖަން (ގއ، ގދ، ޏ އަދި ސ) ގައި ހިމެނޭ ރަށެއްގައި 12 އަހަރުގެ އަންހެން ކުއްޖަކަށް ޖިންސީ ގޯނާކުރިކަމަށް ތުހުމަތުކުރެވޭ މައްސަލައެއް އެ އިދާރާއަށް ރިޕޯޓުކޮށްފައިވެއެވެ. އަދި އޭގެ އިތުރުން، ހއ، ހދ، ށ ގައި ހިމެނޭ ރަށެއްގައި 17 އަހަރުގެ ކުޑަކުއްޖަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް މިމަހުގެ 5 ވަނަ ދުވަހުގެ ރޭ 9:43 ހާއިރު ފުލުހަށް ހުށަހަޅާފައިވެއެވެ. 

މި ދެ މައްސާގައިވެސް އިންޑިއާ މީހުންނަށް ތުހުމަތު ކުރެވޭއިރު، 12 އަހަރުގެ ކުއްޖައާއި ބެހުނު އިންޑިއާ މީހާ ހައްޔަރުވެސް ނުކުރާ ކަމަށް ފުލުހުން ބުނެފައިވެއެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް ފުލުހުންނަށް އަންނަނީ އަމާޒުވަމުންނެވެ.