ހުޅުމާލޭގެ 1000 (ވެށިފަހިމާލެ) ފުލެޓު މަޝްރޫޢުގެ ދަށުން ތަރައްޤީ ކުރެވިފައިވާ ފުލެޓުތަކުގައި ކުލަ ލުމުގެ މަސައްކަތް އެޗްޑީސީން ފަށައިގެން ކުރިއަށްގެންދާ ކަމަށް އެ ކޯޕަރޭޝަނުން ބުނެފިއެވެ. 

އެޗްޑީސީން ބުނީ، ވެށިފަހިމާލެ ފުލެޓު މަޝްރޫޢުގެ ދަށުން ތަރައްޤީ ކުރެވިފައިވާ ނަންބަރު 83 އިން 112 އަށް އެއްމެދު އިމާރާތްތަކުގެ ބޭރުފާރުގެ ކުލަ އައުކުރުމެގެ މަސައްކަތް 23 އޮކްޓޯބަރ 2022 ވީ އާދީއްތަ ދުވަހުންފެށިގެން އެކޯޕަރޭޝަނުން ފަށާފައިވާ ކަމަށެވެ.

މި މަސައްކަތުގެ ދަށުން އިމާރާތުގެ ބޭރުފާރާއި، ފުލެޓުތަކުގެ ބެލްކަނީގެ އެތެރެފާރުގައި ކުލަލުމުގެ އިތުރުން ފުލެޓުގެ ރެނދު ބެއްދުމުގެ މަސައްކަތްވެސް ކުރިއަށް ދާނެ ކަމަށް އެ ކޯޕަރޭޝަނުން މައުލޫތު ދެއެވެ. 

Advertisement

އެޗްޑީސީން އިތުރަށް ބުނީ، މި މަސައްކަތް ހަތަރުމަސް ދުވަސްތެރޭ ނިންމާލެވޭނެ ކަމަށާ ކޮންމެ އިމާރާތެއްގެ މަސައްކަތް ފެށުމުގެ ކުރިން އެ އިމާރާތުގެ ފުލެޓުތަކަށް ނޯޓިސް ދެވޭނެ ކަމަށެވެ. އަދި މަސައްކަތް ކުރުމަށް ހަމަޖެހިފައިވާ  ފުލެޓުތަކުން އެ ފުލެޓުތަކުގެ ބެލްކަނީގެ ފާރުގައި ކުލަލުމަށް މަސައްކަތްތެރިންނަށް މަގުފަހިކޮށްދިނުމަކީ އެ ފުލެޓެއްގެ ވެރިފަރާތުގެ ޒިންމާއެއް ކަމަށާ، އަދި އިމާރާތުގެ ބޭރު ފާރުގައި ކުލަލުމަށް ޖުންގު/ސިޑި ފަދަ ތަކެތި ބޭނުންކުރުމަށް ހަމަޖެހިފައިވާއިރު، އިމާރާތުގެ ބޭރުގައި ބެހެއްޓިފައިވާ ގަސްމުށި، ހަރު، ފެންސު، ޢިމާރާތުގެ ޢާންމު ބައިތަކުގައި ބެހެއްޓިފައިވާ ތަކެއްޗާއި އިންދާފައިވާ ގަސް އަދި އެހެނިހެން ހިފާ ގެންގުޅޭ ތަކެތި އެއްކައިރި ކުރުމަކީ ނުވަތަ ނެގުމަކީ އެތަކެތީގެ ވެރިފަރާތުގެ ޒިންމާއެއް ކަމަށެވެ. 

މީގެއިތުރުން އެޗްޑީސީން ބުނީ، ނުނަގާ ނުވަތަ ނުގެންގޮސް ހުންނަ ތަކެއްޗަކީ ބޭނުންނެތިގެން ދޫކޮށްލައިފައިވާ ތަކެތި ކަމަށް ބަލައި، އެތަކެއްޗާއިމެދު އެ ކޯޕަރޭޝަނުން ފެންނަގޮތަކަށް އަމަލުކުރުމުގެ އިހުތިޔާރު އެ ކޯޕަރޭޝަނަށް ލިބިގެންވާ ކަމަށެވެ.

އަދި މަސައްކަތް ކުރިޔަށް ގެންދިއުމަށްޓަކައި އިމާރާތުގެ ބޭރުގައި ބެހެއްޓިފައިވާ ތަކެއްޗާއި، އެ ކޯޕަރޭޝަނުގެ ހުއްދައާއި ނުލާ ހައްދާފައިވާ ގަސްތައް ހިމެނޭ ގޮތަށް އެ ކޯޕަރޭޝަނުން އެއްކައިރި ކުރުމުގެ ތެރޭގައި އެތަކެތީގެ ވެރިފަރާތަށް ލިބޭ ގެއްލުމަކަށް ޒިންމާނުވާނެކަމަށެވެ. 

ވުމާއެކު، މިކަމަށް އާންމުންގެ ފަރާތުން އެއްބާރުލުން ދިނުމަކީ އެ ކޯޕަރޭޝަނުގެ ވަރަށް ބޮޑު އެދުމެއް ކަމަށްވެސް ބުނެފައިވެއެވެ.