2023 ވަނަ އަހަރަށް ލަފާކޮށް ސަރުކާރުން ހުށައަޅާފައިވާ ބަޖެޓާއެކު މާލޭގެ 5000 އާއިލާއަކަށް ބޯހިޔާވަހިކަން ކަށަވަރުވެގެންދާނެކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް އަޙްމަދު ނަސީމް ވިދާޅުވެއްޖެއެވެ.
އަންނަ އަހަރަށް ލަފާކޮށް ސަރުކާރުން ހުށައަޅާފައިވާ ބަޖެޓަށް މަޖިލީހުގައި ބަހުސްކުރަން މިއަދު ވަނީ ފަށައިފައެވެ.
ބަޖެޓަށް ބަހުސްކުރައްވަމުން މީކާއިލް ވިދާޅުވީ އަންނަ އަހަރަށް ލަފާކޮށް ސަރުކާރުން ހުށައަޅާފައިވާ ބަޖެޓުގައި މާލޭގެ ރައްޔިތުންގެ ބޯހިޔާވަހިކަމުގެ މައްސަލައަށް ހައްލު ހޯދާދިނުމަށް ގިނަ ކަންތައްތަކެއް ހިމަނާފައިވާކަމަށެވެ.
އެގޮތުން ހުޅުމާލެ އަދި ގިރާވަރު ފަޅުގައި 5،000 ގޯތި ރައްޔިތުންނަށް ދެވޭނެ ގޮތަށް ސަރުކާރުން މި ބަޖެޓުގައި ހިމަނާފައިވާކަމަށް މީކާއިލް ވިދާޅުވިއެވެ. އަދި ބަޖެޓު ފާސްވުމުން، މާލޭގެ ރައްޔިތުންނަށް 5،000 ގޯތި ޔަގީންވާނެކަން ފާހަގަކުރައްވާ މީކާއިލް ވަނީ އެކަމާ މެދު ހިތްހަމަޖެހިވަޑައިގަންނަވާ ކަމަށް ވިދާޅުވެފައެވެ.
"އިރާދަކުރެއްވިއްޔާ މިފަހަރު ނިމޭނީ ލިސްޓަކަށް ނަންތައް އަރައިގެންނެއް ނޫން. އިރާދަކުރެއްވިއްޔާ އަންނަ އަހަރު ބަޖެޓު ފާސްވުމާއި އެކު މާލޭގެ ފަސްހާސް އާއިލާއަށް ގޯތީގެ ރަޖިސްޓްރީ ކަށަވަރުވާނެ ކަމަށް އަޅުގަނޑަށް ޔަގީންކުރެވޭ"
ގަލޮޅު އުތުރު ދާއިރާގެ މެމްބަރު މީކާއިލް އަޙްމަދު ނަސީމް
މާލޭގެ ބޯހިޔަވަހިކަމުގައި ހުރި އެހެން މައްސަލަތަކަށް އަލިއަޅުއްވާލައްވާ މީކާއިލް ވަނީ ސިނަމާލެ އަދި މާލެ ހިޔާގެ ހާލަތަށްވެސް ވާހަކަފުޅު ދައްކަވާފައެވެ.
އެގޮތުން އެތަންތަނުގެ މަރާމާތަށް ވެސް ބަޖެޓުގައި 3 މިލިއަނަށް ވުރެ ގިނަ ރުފިޔާ ޚާއްސަކޮށްފައިވާކަން ފާހަގަކުރައްވާ މީކާއިލް ވިދާޅުވީ އެތަންތަން މަރާމާތު ކޮށްގެން އެކަނި ނުނިމޭނެ ކަމަށެވެ. އަދި އެކަމަކީ ދެމެހެއްޓެނިވި ގޮތެއްގައި ކުރަން ޖެހޭނެ ކަމެއްކަން މީކާއިލް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
