ފުލުހުންނާއި ސިފައިންނާއި ގުޅިގެން ޓެރަރިޒަމާއި ދެކޮޅަށް ހިންގާ ޖޮއިންޓް އޮޕަރޭޝަންގެ ތެރެއިން މިހާތަނަށް 11 މީހުން ހައްޔަރު ކުރެވިފައިވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ. 

ކައުންޓަރ ޓެރަރިޒަމްގެ މި އޮޕަރޭޝަން އައްޑޫ ސިޓީއާއި މާލޭގައި އެއްގަމާ ކަނޑުގެ ސަރަޙައްދުގައި އަންނަނީ ހިންގަމުންނެވެ.

ފުލުހުން ބުނީ މިއޮޕަރޭޝަންގައި މިހާތަނަށް ހައްޔަރުކުރި 11މީހުންގެ ތެރޭގައި ހިމެނެނީ، އައްޑޫ ސިޓީން ހައްޔަރުކުރި 9 މީހުންނާއި މާލެ ސަރަޙައްދުން ހައްޔަރުކުރި 2 މީހުންކަމަށެވެ. އަދި ހައްޔަރުކުރި އެންމެންނަކީވެސް ފިރިހެނުންކަމަށް އެ އިދާރާއިން ވަނީ މައުލޫމާތު ދީފައެވެ.

Advertisement

މި އޮޕަރޭޝަން އަދިވެސް ކުރިއަށްދާކަމަށާއި، މި އޮޕަރޭޝަނުގެ ތަފްސީލް ހާމަކުރެވެން އޮތް މިންވަރަކުން ހާމަކުރަމުން ދާނެކަމަށް ފުލުހުން ބުނެފައިވެއެވެ.

ޓެރަރިޒަމާއި ދެކޮޅަށް އޮޕަރޭޝަނެއް ފަށާފައިވާއިރު ޓެރަރިޒަމާ ދެކޮޅަށް ރާއްޖޭގައި މުހިންމު ބޮޑެތި މަސައްކަތްތަކެއް ދަނީ ކުރަމުންނެވެ.

އެގޮތުން ހިންގި އެކި އޮޕަރޭޝަންތަކުގައި މީގެ ކުރިންވެސް މީހުން ހައްޔަރުކޮށްފައިވެއެވެ.

މިމަސައްކަތުގައި އެންމެ މުހިންމު އެއް ކަމެއްގެ ގޮތުގައި، މިދިޔަ އަހަރުވަނީ ޓެރަރިޒަމްގެ ޤާނޫނަށް އިސްލާހު ގެނެސްފައެެވެ. ޤާނޫނަށް ގެނައި ބަދަލުތަކުގައި ޤާނޫނު ތަންފީޒުކުރާ އިދާރާތަކަށް ވަނީ މުހިއްމު ބާރުތަކެއް ދީފައެވެ.