އެމްއެންޑީއެފުން ސެކިއުރިޓީއާއި ހިމާޔަތް ދީގެން ހުޅުމާލޭގައި ހިންދީ ދީނުގެ ޔޯގާ ހަރަކާތެއް ހިންގާފައިވާ ކަމުގެ ތުހުމަތުކުރައްވައިފިއެވެ. 

މި ތުހުމަތު ކުރައްވައި، އެކަން ކުރަމުންދާ މަންޒަރު ވެސް ފެންނަ ވީޑިއޯ އެއް މީސްމީޑިއާގައި އާއްމު ކުރެއްވީ ދީނީ އިލްމުވެރިޔާ ޝައިޚް އާދަމް ނިޝާން އެވެ.

ޝެއިޚް ޢާއްމު ކުރެއްވި އެ ވީޑިއޯ ގައި ހުޅުމާލޭ ތޮށިގަނޑު މަތީގައި މީހަކު މޫދާ ވީ ފަރާތަށް ކުރިމަތިލައިގެން ޔޯގާގެ ހަރަކާތްތަކެއް ކުރާ މަންޒަރު ފެނެ އެވެ. އަދި ސެކިއުރިޓީ ގާޑުން ތަންކޮޅެއް ދުރުގައި މަޑުކޮށްގެން ތިބި ތަންވެސް ފެނެ އެވެ.

އެ ވީޑިއޯ އާއި އެކު ޝެއިޚް ކުރެއްވި ޓުވީޓެއްގައި ވިދާޅުވީ، އެއީ މިއަދު ހެނދުނު އެމްއެންޑީއެފް އިން ސެކިއުރިޓީއާއި ޙިމާޔަތް ދީގެން ހުޅުމާލޭގައި، ހިންދީ ދީނުގެ ޔޯގާ ޙަރަކާތުގެ އެންމެ ބޮޑު ޝިރުކު ހިމެނޭ "ސޫރިޔާ ނަމަސްކާރު - ސަން ސެލިއުޓޭޝަން" ހެދުމަށް، މި ފަސްގަނޑުގައި ފުރުޞަތު ދީފައިވާ ތަން ފެންނަ މަންޒަރު ކަމަށެވެ. 

އަދި ދީނީ ގޮތުން މިއީ އެއްގޮތަކަށްވެސް ހުއްދަވާނެކަމެއް ކަމަށް ނުވާއިރު، މިފަދަ ޝިރުކުގެ ޢަމަލުތައް ކުރުމަށް ފުރުޞަތު ދިނުމަކީ ޤާނޫނީ ގޮތުންވެސް މަނާކުރެވިފައިވާ ކަމެއް ކަން ޝެއިޚް ވަނީ ފާހަގަކުރައްވާފައެވެ. އަދި ދިވެހި ސިފައިންނާއި ފުލުހުންގެ މައްޗަށް ދީނީގޮތުންނާއި ޤާނޫނީ ގޮތުން ވާޖިބުވެ ލާޒިމްވެގެންވަނީ މިފަދަ ކަންކަން ހުއްޓުވުން ކަމަށް ވިދާޅުވެ އެ ފަރާތްތަކަށް ޝެއިޚް ވަނީ ސުވާލުތަކެއް ކުރައްވާފައެވެ. 

"މިފަދަ ޝިރުކާއި ކުފުރުގެ ކަންކަން ކުރުމަށް ފުރުޞަތުދީ، އެތަންތަނުގެ ސެކިއުރިޓީ ބަލަހައްޓައި ޙިމާޔަތްދީ ހަދާ މީސްތަކުން މާދަމާ، އެމުޝްރިކުންނާއި ޝިރުކުގެ ޢަމަލުތަކާއި އެކު މަޙްޝަރު ވާން ބޭނުންވަނީތޯ؟ އަދި ތިމަންމެން އެކަން ކުރީ ތިމަންމެންގެ ވެރީންނާއި ބޮޑުން އަންގައިގެނޭ ބުނެ ސަލާމަތްވާނޭ ކަމަށް ހީކުރަނީ ހެއްޔެވެ؟" ޝެއިޚް ނިޝާން ސުވާލު ކުރައްވާފައިވެއެވެ. 

މި ފަހަކަށް އައިސް ރާއްޖޭގައި ޣައިރު ދީން ތަކުގެ އަޅުކަންކުރާ މައްސަލަތައް އަންނަނީ ވަރަށް ބޮޑަށް އާއްމު ވަމުންނެއެވެ. ނަމަވެސް އެފަދަ ކަންކަން ކުރާ ފަރާތްތަކަށް އެކަށީގެންވާ ފިޔަވަޅު ނޭޅޭތީ ގިނަ އަދަދެއްގެ އާއްމުން އަންނަނީ ކަންބޮޑުވުން ފާޅުކުރަމުންނެވެ.