ނޮވެމްބަރު 10 ވަނަ ދުވަހުގެ ރޭ ދަންވަރު މ. ނިރުފެހިގައި އަލިފާން ރޯވެ ހިނގި ނުރައްކާތެރި އަލިފާނުގެ ހާދިސާގައި ނިޔާވި ދިހަ ވަނަ މީހާގެ ޖިންސާއި ގައުމު ދެނެގަނެވިފައިވާ ކަމަށް ފުލުހުން ބުނެފިއެވެ. 

ފުލުހުން މިއަދު ބުނީ، ނޮވެމްބަރު 10 ވަނަ ދުވަހުގެރޭ ދަންވަރު ގާތްގަނޑަކަށް 12:27 ހާއިރު މ.ނިރުފެހި ގޭގައި ހިނގި އަލިފާނުގެ ހާދިސާގައި ނިޔާވެފައިވާ 10 މީހުންގެ ތެރެއިން މިހާތަނަށް ކާކުކަން ދެނެ ގަނެވިފައި ނުވާ މީހާގެ ގޮތް މިހާރު ދެނެގަނެވިފައިވާ ކަމަށެވެ. 

އެގޮތުން، އެމީހާ އަކީ އިންޑިއާ ފިރިހެނެއް ކަމަށާ، އެ ހާދިސާގައި ނިޔާވީ މީހުންގެ މައުލޫމާތު ފޮރިން މިނިސްޓްރީ އާއި އެމްބަސީތަކަށް އަންގާފައިވާ ކަމަށްވެސް ފުލުހުން ބުނެފައިވެއެވެ. 

އަދި ނިޔާވި މީހުންގެ ތެރެއިން އެމީހުންގެ ޢާއިލާއިން ހަށިގަނޑު، އެމީހުންގެ ގައުމަށް ގެންދަން ބޭނުންވާ މީހުންގެ ހަށިގަނޑު އެމީހުންގެ ގައުމަށް ގެންދިޔުމަށް ކުރަންޖެހޭ މަސައްކަތްތައް ފޮރިން މިނިސްޓްރީ އާއި އެ ގައުމުތަކުގެ އެމްބަސީއާއި ގުޅިގެން ކުރިއަށްދާ ކަމަށްވެސް ފުލުހުން ބުނެފައިވެއެވެ. 

އަލިފާނުގެ ހާދިސާގައި ނިޔާވި 9 މީހުންގެ މައުލޫމާތު މީގެ ކުރިން ފުލުހުން އާއްމު ކޮށްފައިވާ އިރު، އެ މީހުންގެ ތެރެއިން އިންޑިއާއަށް ނިސްބަތްވާ 3 އަންހެނުންނާއި ހަތަރު ފިރިހެނުން ހިމެނެއެވެ. އަދި ބަންގްލަދޭޝް އަށް ނިސްބަތްވާ 1 އަންހެނަކާއި 1 ފިރިހެނެއް ހިމެނޭ ކަމަށްވެސް ފުލުހުން ބުނެފައިވެއެވެ.