ރައްޔިތުންގެ މަޖިލީހުގެ ޖަލްސާ އިއްޔެ ނިންމާލީ ގަވައިދާ ހިލާފަށް ނޫން ކަމަށް މަޖިލީހުގެ ރައީސް، މުހައްމަދު ނަޝީދު މިއަދު ވިދާޅުވެއްޖެ އެވެ.
ޓެކްސްތައް ބޮޑުކުރަން މަޖިލީހަށް ސަރުކާރުން ހުށަހެޅި ބިލަށް އިއްޔެ ވޯޓަށް އަހަން ތާވަލް ކުރުމަށްފަހު ބިލަށް ވޮޓު ލާން އަހަން އޮތް ދަނފަޅީގައި ވޯޓަށް ނާހާ އެ ވަގުތު ރިޔާސަތުގައި އިންނެވި ވިލުފުށީ ދާއިރާގެ އެމްޑީޕީގެ މެމްބަރު ހަސަން އަފީފު ޖަލްސާ ނިންމަވާ ލެއްވީ ރައްޔިތުން މަޖިލީހުގެ ކޯރަމް ހަމަނުވާކަމަށް ބުނެއެވެ.
އެހެން ނަމަވެސް ރިޔާސަތުން އެގޮތަށް އަމަލުކުރީ ގަވާއިދާ ހިލާފަށް ކަމަަށް ބުނެ މަޖިލީހުގެ ގިނަ މެންބަރުން ވަނީ ނުރުހުން ފާޅުކުރައްވާފައެވެ. އެގޮތުން އެކަމާ ހިތް ހަމަ ނުޖެހިގެން ރައްޔިތުން މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފު (މަވޯޓާ) ވަނީ ރިޔާސަތުގެ ގޮނޑީގައި ވެސް އިށީންނަވާފައެވެ.
އެކަމާއި ގުޅޭގޮތުން މިއަދުވެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، ޖަލްސާ ނިންމަން އޮތީ އެންމެ ގޮތެއް ކަމަށާ އެއީ ހަމްދު ކިޔުމަށް ފަހު "މަޖިލިސް ނިމުނީ" އޭ ރިޔާސަތުން ވިދާޅުވެ ޖަލްސާ ނިންމައިލިކަން އިއުލާން ކުރެއްވުން ކަމަށެވެ.
މިއާއެކު ރައީސް ނަޝީދު ވިދާޅުވީ މަޖިލީހުގެ ބަހުސް ނިމުމަށް ފަހު ވޯޓަށް އެހުމަށް ތިން ވަނަ ކިޔުން ކިޔާނެ ކަމަށެވެ. އިއްޔެ ތިން ވަނަ ކިޔުން ނުކިޔާތީ ވޯޓަށް އެހުމުގެ އެއްވެސް މަސައްކަތެއް ނުހިނގާ ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދުގެ މި ވާހަކަފުޅާއި ގުޅިގެން މަވޯޓާ ޝަރީފް ވަނީ ނިޒާމީ މައްސަލައެއް ނަންގަވައި އިއްޔެ މަޖިލީހުގެ ރިޔާސަތު ބެލެހެެއްޓެވި އަފީފު ތިން ގޯހެއް ހެއްދެވި ކަމަށް ވިދާޅުވެފައެވެ. އެގޮތުން އެއްކަމަކީ ކޯރަމް ހަމައަށް އޮއްވައި ކޯރަމް ނެތް ކަމަށް ވިދާޅުވުން ކަމަށް ޝަރީފް ވިދާޅުވިއެވެ.
ޝަރީފު މިފަދައިން ވިދާޅުވުމާއި އެކު ރައީސް ނަޝީދު ވަނީ އޭނާ އިއްޔެ ރިޔާސަތުގެ ގޮނޑީގައި އިށީންދެވަޑައިގަތްކަން ފެނިވަޑައިގަތް ކަމަށް ވިދާޅުވެ އެއީވެސް މ ގަވައިދާ އުސޫލުތަކާއި އަދި ހުރިހާ ހަމަތަކާ ހިލާފު ކަމެއް ކަމަށާ އެއީ ވަރަށް ބޮޑު ހިތާމައެއް ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
