ހިޔާ ފްލެޓަށް ކަރަންޓު ދިނުމަށް އަޅާފައިވާ ކޭބަލް ބުރިވުމުގެ ސަބަބުން ކަރަންޓު ކެނޑިފައިވާ ހިޔާ ފްލެޓްގެ ހުރިހާ ޓަވަރަކަށް މައްސަލަ ހައްލުކޮށް ކަރަންޓު ދިނުމަށް ދެގަޑި އިރު ހޭދަވާނެކަމަށް ސްޓެލްކޯއިން ބުނެފިއެވެ.
މިއަދު 11:30 ހާއިރުން ފެށިގެން ހިޔާ ފްލެޓް ސަރަހައްދުގެ ކަރަންޓާއި ފެން ކެނޑިފައިވާއިރު، 25 ބުރީގެ އިމާރާތައް އަރަން ބޭނުންކުރާ ލިފްޓްތައްވެސް ވަނީ ހުއްޓިފައެވެ.
ސްޓެލްކޯއިން ބުނީ، ހުޅުމާލޭގެ ހިޔާ ޓަވަރުތަކުން ކަރަންޓު ކެނޑިފައިވަނީ، އެ ޓަވަރުތަކަށް ކަރަންޓު ދިނުމަށްޓަކައި އަޅާފައިވާ މައި ކޭބަލަކަށް އިމާރާތްކުރުމުގެ މަސައްކަތް ކުރަމުން އަންނަ ބަޔަކު ކޮނުމުގެ ތެރޭގެއްލުންލިބުމުގެ ސަބަބުންކަމަށާއި، ކޭބަލް މަރާމާތު ކުރުމަށް ގިނަ ވަގުތުތަކެއް ނަގާނެ ކަމަށް ބެލެވޭތީ، އެ ކޭބަލް އައިސޮލޭޓްކޮށް، އެހެން ކޭބަލެއް މެދުވެރިކޮށް ކަރަންޓު ދިނުމުގެ މަސައްކަތް މިހާރު ދަނީ ކުރެވެމުންކަމަށެވެ. މި މަސައްކަތަށް ހޭދަވާނީ 2 ގަޑިއިރު ކަމަށް ބެލެވޭކަމަށް ސްޓެލްކޯއިން ބުނެފައިވެއެވެ.
ހުޅުމާލެ ދެވަނަ ފިޔަވަހީގައި ހިޔާ ފްލެޓަށް ކަރަންޓު ދިނުމަށް އަޅާފައިވާ ކޭބަލް ބުރިވާ މައްސަލަތައް މީގެ ކުރިން ވެސް ވަނީ ދިމާވެފައިވެއެވެ.
Advertisement
This content is created and paid for by advertisers and does not involve Voice Journalists
