ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ޢަމަލު ކުރައްވަމުން ގެންދަވާ ގޮތާއި މެދު ނުރުހުން ފާޅުކޮށް އެކަމުގެ ޝަކުވާ އާއި އެކު، ރައްޔިތުންގެ މަޖިލީހުގެ އެމްޑީޕީ ބައެއް މެންބަރުން ރައީސުލްޖުމްހޫރިއްޔާ އަދި އެމްޑީޕީގެ އިސް ލީޑަރު އިބްރާހިމް މުހައްމަދު ޞާލިހްއާ މިއަދު ބައްދަލު ކުރައްވައިފި އެވެ. 

ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ 26 މެންބަރުން ބައިވެރިވެ ވަޑައިގެންނެވި މި ބައްދަލުވުމާއި ގުޅޭ ގޮތުން މައުލޫމާތު ދެއްވަމުން މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވީ، އެ ބައްދަލު ވުމަކީ މަޖިލީހުގެ ތެރޭގަޔާއި ބޭރުގައިވެސް ރައީސް ނަޝީދު ކަންކުރަމުން އަންނަ ގޮތުން އެކަމާއި މެދު ކަންބޮޑުވުން ފާޅުކޮށް، އެމަނިކުފާނުގެ އިތުބާރު ނެތް ކަމުގެ ވޯޓު ނެންގެވުމާއި މެދު ރައީސް ޞާލިހާއި މަޝްވަރާ ކުރެއްވުމަށް ބޭއްވި ބައްދަލުވުމެއް ކަމަށެވެ. 

މަވޯޓާ ޝަރީފް ވިދާޅުވީ، މީގެ ކުރިންވެސް ރައީސް ނަޝީދުގެ އިތުބާރުގެ ނެތް ކަމުގެ ވޯޓު ނަގަން އެ ޕާޓީގެ 44 މެންބަރުން އެއްބަސް ވެވަޑައިގެންފައިވާ ކަމަށެވެ. އެހެންނަމަވެސް، އެފަހަރުވެސް އެކަން ނުކުރެވުނީ، ޕާޓީގެ މަސްލަހަތަށްޓަކައި އަދި ރައީސް ނަޝީދަކީ ޕާޓީގެ ރައީސް ކަމަށް ވުމުން، އެކަން މަޑު ޖައްސާލެއްވުމަށް ރައީސް ޞާލިހު ދެންނެވުމުން ކަމަށް އޭނާ ވިދާޅުވިއެވެ.  

"އަޅުގަނޑުމެންނަށް މަލާމާތް ކުރުމާއި، ފުރައްސާރަ ކުރުމާއި، ޖެއްސުން ކުރުމާއި، ގަވާއިދާ ޚިލާފަށް ހިތުހުރި ގޮތަކަށް ކަންކަން ކުރައްވަމުންދާތީ އޭރުވެސް އިތުބާރު ނެތްކަމުގެ ވޯޓު ނަގަން އަޅުގަނޑުމެން ނިންމީ. އަޅުގަނޑުމެން އަތުގައި އެބައޮތް 44 މެންބަރުންގެ ސޮއި. ސާފު ސީދާ. އެއަށްވުރެ މާ ގިނަ ވޯޓުވެސް ލިބޭނެ. އެހެންނަމަވެސް އެދުވަހުވެސް ރައީސް ވިދާޅުވި ކަމަށް އިހްތިރާމް ކޮށްފައި، ޕާޓީގެ މަސްލަހަތަށްޓަކައި އެންމެ ރަނގަޅު ވާނީ އިހަށް ކެތްތެރިވެ މަޑު ކޮށްލިއްޔާ ކަމަށް ވިދާޅުވީމާ އަޅުގަނޑުމެން. އަނެއްކާވެސް މިއަދުވެސް އަޅުގަނޑުމެން ކެތް ނުވެގެން އަނެއްކާވެސް އެވާހަކަ ދަންނަވަން." މަވޯޓާ ޝަރީފް ވިދާޅުވިއެވެ. 

ޝަރީފް ވިދާޅުވީ މިއަދުވެސް ރައީސް ޞާލިހަށް ޝަކުވާ ދެންނެވުމުން އެމަނިކުފާނު ދެންނެވީ، އިހަށް އިތުބާރު ނެތްކަމުގެ ވޯޓު ނުނަގައި މަޑުކޮށްލުމަށް ކަމަށާ، އެ މައްސަލަ ހައްލު ކުރާނެ ގޮތެއް ހޯދުމަށް އެމަނިކުފާނު ވިސްނަވާނެ ކަމަށް ކަމަށެވެ. 

މިއާއެކު އޭނާ ވިދާޅުވީ، މެންބަރުންގެ އެންމެ ބޮޑު އެއް ކަންބޮޑުވުމަކީ 2023 ވަނަ އަހަރުގެ ބަޖެޓާއި، އަދި ޖީއެސްޓީއާއި ޓީޖީއެސްޓީ ބޮޑު ކުރުމަށް މަޖިލީހަށް ހުށަހަޅާފައިވާ ބިލަށް ވޯޓަށް އެހުމުގެ ކަންކަން ރައީސް ނަޝީދު ލަސްކުރައްވަމުން ދިޔުން ކަމަށެވެ. އެހެންނަމަވެސް، މާދަމާ އޮންނަ މަޖިލީހުގެ ޖަލްސާގައި ޖީއެސްޓީއާއި ޓީޖީއެސްޓީ ބިލަށް ވޯޓު ލުމަށް ރައީސް ނަޝީދު ހުޅުވާލާނެ ކަމަށާ، އަދި މި ދައުރު ނިމުމުގެ ކުރިން ބަޖެޓަށް ވޯޓު ލުންވެސް ނިމޭނެ ކަމުގެ ޔަގީންކަން ރައީސް ޞާލިހު ދެއްވާފައިވާ ކަމަށެވެ.