މަހުގެ މިހިސާބަށް އަންނައިރު މަދު މީހެއްގެ އަތުގައި ނޫނީ 100 ރުފިޔާވެސް ނޯންނާނެ ކަމަށާ އެމީހުން ދިރިއުޅެމުންދަނީ ސަލާން ޖަހައިގެން ކަމަށް މެދު ހެންވޭރު ދާއިރާގެ މެންބަރު ޢަލީ އާޒިމް ވިދާޅުވެއްޖެއެވެ. 

އަންނަ އަހަރަށް ލަފާކޮށް ސަރުކާރުން ރައްޔިތުން މަޖިލީހަށް ހުށަހެޅި ބަޖެޓު ދިރާސާ ކުރުމަށްފަހު ބެޖެޓް ކޮމިޓީން ވަނީ އިތުރު އިސްލާހުތަކާ އެކު ބަޖެޓަށް 160 މިލިއަން ރުފިޔާ އިތުރުކޮށްފަ އެވެ. އެއާ އެކު ކޮމިޓީން ފާސްކުރި ބަޖެޓްގެ އަދަދަކީ 42.8 ބިލިއަން ރުފިޔާ އެވެ.

އަދި އިތުރު ހުށަހެޅުންތަކާއި، ރިކޮމެންޑޭޝަންތަކާއެކު ކޮމިޓީން ބަޖެޓު ފާސްކޮށް މިހާރު ކުރިއަށްދާ މަޖިލީހުގެ ޖަލްސާގައި ކުރިއަށްދަނީ އެ ދިރާސާ ރިޕޯޓާއި ބަޖެޓާއި ގުޅޭގޮތުން ބަހުސް ކުރުމެވެ. 

އެގޮތުން ބަހުސް ކުރައްވަމުން އާޒިމް ވިދާޅުވީ 2023 ވަނަ އަހަރުގެ ބަޖެޓްގެ ދިރާސާ ކުރާ ކޮމިޓީގެ ރިޕޯޓަކީ ދަޒުބާތުގައި ޖެހިގެންތިބެ، ހަގީގަތާއި ދުރަށް ޖައްސާލައި، ގައުމު ބަނގުރޫޓުވުމާއި ދިމާއަށް މިސްރާބު ޖަހާފައިވާ ރިޕޯޓެއް ކަމަށެވެ.

"ގައުމުގެ މަސްލަހަތަށްވުރެ އަމިއްލަ މަސްލަހަތު ކުރިއަށް ނެރެގެން ކުރާ މަސައްކަތުގެ ނަތީޖާ ލ، އޭގެ ނުރަނގަޅު އަސަރު ހަގީގަތުގައި ދުވަސް ކޮޅެއްގެ ފަހުން ކުރާނީ. އެތަން ރައްޔިތުންނަށްވެސް އަޅުގަނޑުމެންގެ މެންބަރުންނަށްވެސް ފެނިގެންދާނެ ކަމާމެދު އަޅުގަނޑު ޝައްކެއް ނުކުރަން." ޢާޒިމް ވިދާޅުވިއެވެ. 

އެއާއެކު އާޒިމްވަނީ މި ނޮވެމްބަރު މަސް ނިމެން ކުޑަ ދުވަސްކޮޅެއް ވެފައިވާއިރު މުސާރައަށް މަސައްކަތް ކުރާ މީހެއް ކައިރިން ބާކީ މިމަހުގައި ބޭނުންކުރަން ހުރީ ކިހާ ފައިސާއެއްތޯ އަހައިފިނަމަ، މަދު މީހެއްގެ އަތުގައި ނޫނީ 100 ރުފިޔާވެސް ނޯންނާނެ ކަމަށް ވިދާޅުވެފައެވެ. 

އާޒިމް ވިދާޅުވީ ދިވެހިންގެ ހާލަތު މިހާރު ހުރީ އެ ހިސާބުގައި ކަމަށާ، އެހެންނަމަވެސް އެވަރަށް ވިސްނާލުމެއްނެތި އަދި ދިރާސާ ކުރުމެއްނެތި، މިހާ ހޮޑު ދަރަނި ބަޖެޓެއް މަޖިލީހުން ފާސްކުރަން ހުށަހަޅައި، އެ ބަޖެޓަށް ތާއީދުކުރާނީ ރައްޔިތުން ނިކަމެތިކޮށް ގައުމު ބަނގުރޫޓު ކުރަން ވިސްނާފައި ތިބި މީހުންކަމާއިމެދު ޝައްކެއްނެތް ކަމަށެވެ.