ރާއްޖޭގެ އަސާސީ ކަންކަމަށް ބޭނުންވާނެ ފައިސާ އެކަށީގެންވާ މިންވަރަށް ރިޒާވްގައި ނެތްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އަންނަ އަހަރަށް ލަފާކޮށް ދައުލަތުން އެކުލަވާލި ބަޖެޓް ދިރާސާކޮށް ބަޖެޓް ކޮމިޓީން އެކުލަވާލި ރިޕޯޓަށް މިއަދު ވަނީ ބަހުސްކުރަން ފަށާފައެވެ.

މިއަދުގެ ޖަލްސާގައި މެންބަރުންނަށް ބަހުސް ކުރެއްވުމަށް ފުރުސަތު އަރުވަމުން ރިޔާސަތުގައި އިންނަވާ ނަޝީދު ވިދާޅުވީ، ރާއްޖޭގެ އަސާސީ ކަންކަމަށް ބޭނުންވާ ފައިސާ މަދުވެފައިވާއިރު، ފައިސާ ހުރި ކަމަށް ބުނުމަކީ ކަނޑައެޅިގެން އޮޅުވާލުމެއް ކަމަށެވެ. 

"އަޅުގަނޑު ދެކޭ ގޮތުގައި، އަޅުގަނޑު ފާހަގަކުރަން ޖެހޭ ނުކުތާއެއް އެބަވޭ. އެއީ، ދިވެހި ދައުލަތުގެ ފޮރިން ކަރެންސީ ރިޒާވްގައި ފައިސާހުރި މިންވަރު. މިވަގުތު ދިވެހި ދައުލަތުގެ ފޮރިން ކަރެންސީ ރިޒާވްފައި ފައިސާހުރީ މަދުން" އެމަނިކުފާނު ފެއްޓެވިއެވެ.

އަދި މަޖިލީހުގެ ރިޔާސަތުގައި އެމަނިކުފާނު އިންނަވައިގެން އެކަން ފާހަގަނުކޮށް ދޫކޮށްލުމަކީ ރާއްޖޭގެ ރައްޔިތުންނަށް އޮޅުވާލެވޭ ވަރަށްބޮޑު އޮޅުވާލުމެއް ކަމަށްވެސް އެމަނިކުފާނު ވިދާޅުވިއެވެ. 

“ކުރިއަށް އޮތް ހަފުތާތަކުގައި، ކުރިއަށް އޮތް މަސްތަކުގައި އަޅުގަނޑުމެންގެ ރާއްޖޭގެ އަސާސީ ކަންކަމަށް ބޭނުންވާނެ ފައިސާ ނެތީސް، އަޅުގަނޑުމެން މި މަޖިލީހުގައި އެެހެން ގޮތަކަށް ވާހަކަ ދައްކަމުން ގެންދިއުމަކީ ރާއްޖޭގެ ރައްޔިތުންނަށް އޮޅުވައިލެވޭ ވަރަށް ބޮޑު އޮޅުވައިލުމެއް.” ރައީސް ނަޝީދު ވިދާޅުވިއެވެ.

އަންނަ އަހަރަށް ލަފާކޮށް ސަރުކާރުން ރައްޔިތުން މަޖިލީހަށް ހުށަހެޅި ބަޖެޓު ދިރާސާ ކުރުމަށްފަހު ބެޖެޓް ކޮމިޓީން ވަނީ އިތުރު އިސްލާހުތަކާ އެކު ބަޖެޓަށް 160 މިލިއަން ރުފިޔާ އިތުރުކޮށްފަ އެވެ. އެއާ އެކު ކޮމިޓީން ފާސްކުރި ބަޖެޓްގެ އަދަދަކީ 42.8 ބިލިއަން ރުފިޔާ އެވެ. 

އެ ބަޖެޓުގެ ބޮޑުކަމާއި، އަދި ދަރަނި ބޮޑުކަމާއި ގުޅިގެން ރައީސް ނަޝީދު އަންނަނީ ކަންބޮޑުވުން ފާޅުކުރައްވަމުންނެވެ.