މެންޗެސްޓަރ ޔުނައިޓެޑަށް އޮތް ލޯތްބަށް ދުވަހަކުވެސް ބަދަލެއް ނާންނާނެ ކަމަށާއި މިއީ އާ ޗެލެންޖެއް ނުވަތަ އާ ކުލަބަކަށް ބަދަލުވާން ޖެހޭ ދަނޑިވަޅުކަމަށް ގަބޫލުކުރާ ކަމަށް ކްރިސްޓިއާނޯ ރޮނާލްޑޯ ބުނެފިއެވެ. 

ކެރިއަރުގައި ބޮޑެތި ކާމިޔާބުތަކެއް ހޯދި މެންޗެސްޓަރ ޔުނައިޓެޑުގައި ރޮނާލްޑޯ ހޭދަކުރި ދުވަސްތަކަށް ފަހު މައްސަލަ ހޫނުވީ އޭނާ ދިން އިންޓަވިއު އަކާއި ގުޅިގެންނެވެ. 

އެ އިންޓަވިއުގައި ރޮނާލްޑޯ ވަނީ ޔުނައިޓެޑު ބަދުނާމުކޮށް ގިނަ ވާހަކަތަކެއް ދައްކާފައެވެ. އެ މައްސަލަ ހޫނުވެފައިވަނިކޮށް ރޮނާލްޑޯ ވަނީ އެ ވާހަކަތައް ދިފާއުކޮށް ދާދިފަހުން ވާހަކަވެސް ދައްކާފައެވެ. 

Advertisement

އެ ވާހަކަތާއެކު މައްސަލަ އިތުރަށް ހޫނުވެ އެންމެފަހުން ޔުނައިޓެޑުން ވަނީ ރޮނާލްޑޯ އާއެކު ވެފައިވާ އެއްބަސްވުން އުވާލާފައިވާ ކަމަށް އިއުލާނުކޮށްފައެވެ.

ރޮނާލްޑޯވަނީ ޔުނައިޓެޑުން އޭނާއަށް ކަންތައް ކޮށްފައިވަނީ އެންމެ ރަނގަޅަށް ނޫން ކަން ހާމަކޮށްފައެވެ. އަދި އޭނާ ޓީމުން ބޭރު ކޮށްލަން މަސައްކަތް ކުރަމުންދާކަމަށް ރޮނާލްޑޯވަނީ ތުހުމަތު ކޮށްފައެވެ. މީގެ އިތުރުން ކްލަބްގެ ކޯޗް ޓެން ހާގް އަށް އޭނާގެ އިހްތިރާމް ލިބިގެން ނުވާކަމަށްވެސް ހާމަކޮށްފައިވެއެވެ.

ރޮނާލްޑޯ މިހާރު އަންނަނީ ވާރލްޑް ކަޕަށް ޕޯޗުގަލް ޓީމާއެކު ތައްޔާރުވަމުންނެވެ. މިފަހަރުގެ ސީޒަންގައި ރޮނާލްޑޯއަށް ޔުނައިޓެޑްގައި ހޭދަކުރިތަން ފެނިގެންދިޔައީ އެހާ ހިތްހަމަ ޖެހޭ ދުވަސްތަކެއް ނުނެވެ. މިގޮތުން ފުރަތަމަ އެގާރައިން މަދުން ޖާގަލިބޭ އިރު ދެތިން ފަހަރެއްގެމަތިން ކްލަބާއި ކޯޗާއި މައްސަލަ ޖެހި ފައިވެއެވެ.