ރައްޔިތުންގެ މަޖިލީހުގެ ކޮންމެ މެންބަރަކަށް ވެސް 80,000 އަށްވުރެ ބޮޑު މުސާރައެއް ގެއަށް ގެންދަން ލިބޭއިރު، ވަގުތަށް މަޖިލީހަށް ހާޒިރު ނުވުމަކީ ވަރަށް ބޮޑު ހިތާމައެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވައިދެއްވަމުން މެންބަރުންގެ ހާޒިރީ ވިދާޅުވަމުން ރައީސް ނަޝީދު ވިދާޅުވީ ރައްޔިތުންގެ މަޖިލީހުގައި ޖުމުލަ 87 މެންބަރުން ތިއްބަވާ ކަމަށެވެ. އެހެން ނަމަވެސް, މަޖިލީހަށް ހާޒިރުވާން ޖެހޭ ވަގުތު ފަހަނަ އަޅައި ގޮސް، ރަންގަބީލު ޖެހުމަށްފަހުގައި ހާޒިރުވެ ތިބި މެންބަރުންގެ އަދަދު ކަމަށްވެސް އެމަނިކުފާނު ވިދާޅުވިއެވެ.
"އެނގިވަޑައިގަންނަވާނެ މިއީ 87 މެންބަރުންގެ މަޖިލީހެއް. އަދި ކޮންމެ އިއްޒަތްތެރި މެންބަރަކަށްވެސް އިންތިހާއަށް މުސާރަ ލިބިވަޑައިގަންނަވާނެ. ކޮމިޓީ އެލަވަންސް އެހާމެ ގިނައިން ލިބިވަޑައިގަންނަވާ. މެންބަރެއްގެ މުސާރައިގެ ގޮތުގައި 80 ހާހަށްވުރެ ގިނަ ރުފިޔާ، އެބަ ގެއަށް ގެންދަވާ."
މަޖިލީހުގެ ރައީސް މުހައްމަދު ނަޝީދު
ރައީސް ނަޝީދު ވިދާޅުވީ، މެންބަރުން މަޖިލީހަށް އިންތިހާބުވެވަޑައިގެންފައިވަނީ ރައްޔިތުންގެ ވާކީލުންގެ ގޮތުގައި ކަމަށެވެ. އަދި އެ ރައްޔިތުން މެންބަރުން އިންތިޚާބުކުރީ ރައްޔިތުން މަޖިލީހުގައި ތަމްސީލް ކުރުމަށް ކަން ފާހަގަކުރައްވައި ރައީސް ނަޝީދު ވިދާޅުވީ، ކަން އެހެން އޮތް އިރު މެންބަރުން މަޖިލީހަށް "ވަޑައިނުގަންނަވާ ކަމީ ވަރަށް ބޮޑު ހިތާމައެއް" ކަމަށެވެ.
އެހެންކަމުން، މިއަދު ރިޔާސަތުން އަންގަވާ އެންގެވުމަކަށް ވެސް އެމަނިކުފާނު އެންގެވީ މަޖިލީހުގެ ޖަލްސާ ތަކަށް ވަގުތަށް ގަވާއިދުން މެންބަރުން ހާޒިރުވެ، މަޖިލީހުގައި ކުރިއަށްދާ ބަހުސްތަކުގައި ބައިވެރިވުން ކަމަށް އެމަނިކުފާނު ވިދާޅުވިއެވެ.
ރައްޔިތުންގެ މަޖިލީހުގެ މެންބަރުން ވަގުތަށް ކަމޭ ނުހިތާ ކާމާއި، މެންބަރުންގެ ހާޒިރީ ދަށް ކަން ފާހަގަކުރައްވައި މީގެ ކުރިންވެސް އެކި ފަހަރުމަތިން ރައީސް ނަޝީދު ވަނީ ކަންބޮޑުވުން ފާޅުކުރައްވާފައެވެ.
Advertisement
This content is created and paid for by advertisers and does not involve Voice Journalists
