ސަރުކާރު ކުންފުންޏެއް ކަމަށްވާ (ރޯޑް ޑިވެލޮޕްމެންޓް ކޯޕަރޭޝް) އާރްޑީސީއަށް ބޮޑު އަގުގައި މަގު ހަދަން ހަވާލުކުރީ އެ ކުންފުނީގެ ދަރަންޏަށް ލުއިދޭން ކަމަށް މާލެ ސިޓީ ކައުންސިލުގެ ގަލޮޅު އުތުރު ދާއިރާގެ އެމްޑީޕީ ކައުންސިލަރު ސައިފް ފާތިހު ވިދާޅުވެއްޖެއެވެ.
އަމީނީ މަގު ހެދުމުގެ މަޝްރޫއު ލަސްވެ، އެ މަސައްކަތް މަޑު ޖެހިފައި އޮތުމާއި ގުޅިގެން ކަންބޮޑުވުން ފާޅުކުރައްވައި ސައިފް ކުރެއްވި ޓުވީޓެއްގައި ވިދާޅުވީ، މަގުތަކަކީ މުނިސިޕަލް ކަމެއް ކަމަށެވެ.
އަދި ލާމަރުކަޒީ ގާނޫނުގެ ދަށުން މުނިސިޕަލް ޚިދުމަތްތަކަކީ ސިޓީ ކައުންސިލްގެ ދަށުގައި އޮންނަ ކަންކަން ކަމަށް ވާއިރު، ސިޓީ ކައުންސިލް އަތުން އެ މަސައްކަތް ނަގައި، ބޮޑު އަގުގައި އެ މަސައްކަތް ސަރުކާރު ހިއްސާވާ ކުންފުންޏަކާ ހަވާލުކުރީ އެ ކުންފުނީގެ ދަރަންޏަށް ލުއިދޭން ކަމަށް އޭނާ ވިދާޅުވިއެވެ.
ސައިޕލފް ވިދާޅުވީ އެފަދައިން ކަންކުރުމުން އެ ކުންފުނި ޖަވާބުދާރީއެއް އަދި ޒިންމާދާރެއް ނުކުރެވޭ ކަމަށެވެ. އަދި ހަތަރު މަސް ދުވަހުން މަގުގެ ވިހި ފޫޓުގެ މަސައްކަތް ވެސް ނުނިމޭ ކަމަަށް އޭނާ ވިދާޅުވި އެވެ.
އަމީނީ މަގު ހެދުމުގެ މަސައްކަތް މާލޭ ސިޓީ ކައުންސިލްގެ ބެލުމުގެ ދަށުން އާރުޑީސީއަަށް ހަވާލު ކޮށްފައިވަނިކޮށް، ސިޓީ ކައުންސިލްގެ އަތުން އެ މަސައްކަތް ނަގައި، އަލުން އަނެއްކާ އެ މަސައްކަތް، ސަރުކާރުން އާރުޑީސީއާއި ހަވާލު ކުރީ 80 އެތައް މިލިއަން ރުފިޔާއަކަށެވެ.
ބޮޑު އަގުގައި މަސައްކަތް ހަވާލުކޮށްފައި ވަނިކޮށް މަސައްކަތް މަޑުޖެހި ލަސްވަމުންދާތީ އާންމުން ޝަކުވާކުރަން ފެށުމުން އިއްޔެ އެ ކުންފުނިން ނެރުނު ބަޔާނެއްގައި ބުނެފައިވަނީ އެ މަސައްކަތް ނުހުއްޓޭކަމަށެވެ. ނަމަވެސް އެމްޑަބްލިއުއެސްސީން ދޭ ބައެއް ޚިދުމަތްތައް ދިނުމަށް ބޭނުންވާ ވަސީލަތްތައް ނުލިބުމުގެ ސަބަބުން މަސައްކަތް މަޑުޖައްސާލަންޖެހިފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
