ރާއްޖޭގެ އިގުތިސޯދީ ހާލަތާއި ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދަދެއް ވިދާޅުވެއްޖެ ނަމަ އެ ވިދާޅުވާނީ އެއަދަދާއި ގުޅުން ހުރި މުއައްސަސާތަކުން ފުރިހަމަ މައުލޫމާތު ހޯއްދަވައިގެންކަން ޔަގީން ކުރައްވާ ކަމަށް ވިދާޅުވެ މަޖިލީހުގެ ނައިފަރު ދާއިރާގެ މެންބަރު އަހްމަދު ޝިޔާމް އެމަނިކުފާނަށް ތައުރީފް ކުރައްވައިފިއެވެ.
މިފަހަކަށް އައިސް ސަރުކާރަށް ވަރަށް ފާޅުގައި ރައީސް ނަޝީދު ފާޑުވިދާޅުވަމުންދާއިރު، އެންމެ ބޮޑަށް ދައްކަވަނީ ރާއްޖޭގެ އިގްތިސާދީ ހާލަތުގެ ހީނަރުވެފައިވާ ވާހަކަ އާއި ބަޖެޓުގެ ބޮޑު ކަމާއި ޓެކްސް ބޮޑު ކުރަން ނިންމެވި ނިންމެވުން ރަނގަޅު ނޫން ވާހަކައެވެ. އެމަނިކުފާނުގެ އެވާހަކަތަކަށް ރައީސް އިބްރާހިމް މުހައްމަދު ޞާލިހަށް ތާއީދު ކުރައްވާ މެންބަރުންގެ ނުރުހުން އަމާޒުވެފައިވަނިކޮށް، މިއަދުގެ މަޖިލީހުގެ ޖަލްސާގައި ޝިޔާމް ވަނީ އެވާހަކާއި އެއްބައިވެ ވާހަކަ ދައްކަވާފައެވެ.
އެގޮތުން ޝިޔާމް ވިދާޅުވީ ނަޝީދު މަޖިލީހުގެ ޖަލްސާ އާއި އަދި މަޖިލިސް މެންބަރުންގެ ވަޓްސްއެޕް ގްރޫޕްގައި ވަކި އަދަދެއް ވިދާޅުވުމަށްފަހު ވާހަކަފުޅު ދައްކަވަނީ މުއައްސަސާތަކުން އެމައުލޫމާތު ހޯއްދަވައިގެން ކަމާއިމެދު ޝައްކު ނުކުރައްވާ ކަމަށެވެ.
"ރައްޔިތުންގެ މަންދޫބުންގެ ގޮތުގައި ތިބެ މިތަނުގައި ދައްކާ ވާހަކަތަކަކީ ސީރިއަސްކަން އޭގައި ހުރި ވާހަކަތަކެއްކަން ސަރުކާރުން ވެސް ގަބޫލުކުރަން ޖެހޭ. ރައްޔިތުން މަޖިލީހުގެ ރިޔާސަތުން (ރައީސް ނަޝީދު) ވަކިން ހާއްސަކޮށް އަދަދެއްގެ ވާހަކަ ވިދާޅުވާނީ އަޅުގަނޑަށް ހަމަ ޔަގީން އެއަދަދާއި ގުޅުން ހުރި މުއައްސަސާތަކުން ފުރިހަމަ މައުލޫމާތު ހޯއްދަވައިގެންކަން." ޝިޔާމް ވިދާޅުވިއެވެ.
މީގެ އިތުރުން، ޓެކްސް ނަގައިގެން ދައުލަތައް ލިބޭ ފައިސާ އިން ކުރަނީ ކީއްތޯ ރައްޔިތުން ސުވާލު އުފައްދަމުން ގެންދާ ކަމަށްވެސް ޝިޔާމް ވިދާޅުވެފައެވެ.
މި ފަހަކަށް އައިސް މީސްމީޑިއާގަޔާއި މަޖިލީހުގެ ޖަލްސާ ތަކުގައިވެސް ރައީސް ނަޝީދު އަންނަނީ ރާއްޖޭގެ އިގްތިސާދީ ހާލަތާއި ގުޅޭގޮތުން ކަނބޮޑުވުން ފާޅުކުރައްވަމުންނެވެ. އަދި ރިޒާވްގައި ހުރި ފައިސާގެ އަދަދު ކުޑަވެ އެވާހަކަ އެމަނިކުފާނު ދައްކަވާފައިވާއިރު، ފިނޭންސް މިނިސްޓަރާއި ސަރުކަާރަށް ތާއީދު ކުރައްވާ މެންބަރުން ވަނީ ރައީސް ނަޝީދު ރައްޔިތުންނަށް އޮޅުވާލައްވަން މަސައްކަތް ކުރައްވާ ކަމަށް ވިދާޅުވެފައެވެ. އަދި ރައީސް ނަޝީދަކީ އިދިކޮޅު ކޯލިޝަނަށް ތާއީދު ކުރައްވާ ބޭފުޅެއް ކަމަށް ވެސް އެ މެންބަރުން އަންނަނީ ސިފަކުރައްވަމުންނެވެ.
Advertisement
This content is created and paid for by advertisers and does not involve Voice Journalists
