2023 ވަނަ އަހަރަށް ލަފާކޮށް ރައްޔިތުންގެ މަޖިލީހަށް ސަރުކާރުން ހުށަހެޅި ބަޖެޓް ފާސްކޮށްފިއެވެ.

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅީ ޖުމްލަ 42.608 ބިލިއަން ރުފިޔާގެ ބަޖެޓެކެވެ. އެހެންނަމަވެސް ބަޖެޓް ކޮމިޓީން ކުރި މަޝްވަރާތަކަށް ފަހު އަންނަ އަހަރަށް ލަފާކުރެވޭ ބަޖެޓަށް ވަނީ 160 މިލިއަން ރުފިޔާ އިތުރުކޮށްފައެވެ. އެއާއެކު 2023 ވަނަ އަހަރަށް ހުށަހަޅާފައިވާ ބަޖެޓުވަނީ 42.8 ބިލިއަން ރުފިޔާއަށް އަރާފައެވެ. އެ ބަޖެޓު މިއަދުގެ ރައްޔިތުންގެ މަޖިލީހުން ވަނީ ފާސް ކޮށްފައެވެ. 

ބަޖެޓު ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 61 މެންބަރެއްގެގެ ވޯޓާއި އެކުގައެވެ. އެއީ ވޯޓުގައި ބައިވެރިވެވަޑައިގެންނެވި ޖުމުލަ މެންބަރުންގެ 78.21 އިންސައްތައެވެ. ބަޖެޓު ފާސްކުރަން ވޯޓު ނުދެއްވީ ވޯޓުގައި ބައިވެރިވެވަޑައިގަތް 8 މެންބަރެކެވެ. ބަޖެޓު ފާސްކުރަން ބޭނުންވަނީ 35 ވޯޓެވެ. އެހެންކަމުން ބަޖެޓު ވަނީ ފާސްވެފައެވެ.

Advertisement

އަންނަ އަހަރަށް ލަފާކުރާ ބަޖެޓާއެކު 2022 ވަނަ އަހަރުގެ ސަޕްލިމެންޓަރީ ބަޖެޓްގެ ގޮތުގައި 5.8 ބިލިއަން ރުފިޔާގެ ބަޖެޓްވެސް މަޖިލީހުން ވަނީ ފާސްކޮށްފައެވެ.

މި ބަޖެޓަށް ސަރުކާރަށް ތާއީދުކުރައްވާ މަޖިލީހުގެ މެންބަރުން ވަރަށް ބޮޑަށް ތާރީފުކުރައްވާއިރު، އިދިކޮޅު މެންބަރުންނާއި އެމްޑީޕީގެ ރައީސް ނަޝީދަށް ތާއީދުކުރައްވާ މެންބަރުންވަނީ މި ބަޖެޓަކީ ދައުލަތުގެ ދަރަނި އިންތިހާއަށް އިތުރުކުރާ ބަޖެޓެއްކަން ފާހަގަކުރައްވައި ކަންބޮޑުވެވަޑައިގަންނަވާ ގިނަ ކަންތައްތަކެއް ފާހަގަކުރައްވާފައެވެ.