ގާނޫނަކީ ހަމައެކަނި އާދައިގެ ރައްޔިތަކު ކަމެއް ކުރުމުން ހިންގަން އޮންނަ އެއްޗެއް ނޫން ކަމަށް ޖަމިއްޔަތުއްސަލަފްގެ ޗީފް މާކެޓިންގ އޮފިސަރ ޢަލީ ރަމީޒު ވިދާޅުވެއްޖެެއެވެ. 

ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު 50 އަށްވުރެ ގިނަ މީހުން މަރާލައި ގަތުލުއާންމެއް ހިންގަން އުޅުނު ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) ތުހުމަތު ކުރެއްވުމާއި ގުޅިގެން ޢަކީ ރަމީޒު ކުރެއްވި ޓުވީޓެއްގައި ވިދާޅުވީ، ރާއްޖޭގެ ކުރީގެ ރައީސަކަށް މަޖިލީހުގެ މެންބަރަކު އެފަދަ ތުހުމަތެއް ކުރެއްވުމުން އެ މައްސަލަ ބެލެން ޖެހޭނެކަމަށެވެ. 

"ގާނޫނަކީ ހަމައެކަނި އާދައިގެ ރައްޔިތަކު ކަމެއް ކުރީމާ ހިންގަން އޮންނަ އެއްޗެއް ނޫން." ޢަލީ ރަމީޒު ވިދާޅުވިއެވެ. 

ރައީސް މައުމޫންގެ ވެރިކަމުގައި، ބޮމެއް ގޮއްވާލާ 50 ވުރެ ގިނަ މީހުން މަރާލުމަށް ފަހު އެކަން މައުމޫންގެ ބޮލުގައި އެޅުވުމަށް ނަޝީދު އިސްވެ ރޭއްވެވި ކަމަށް ޝަރީފް ވަނީ ތުހުމަތުކުރައްވާފައެވެ. އަދި އެކަން ހުއްޓުވީ އެމްޑީޕީގެ ޕާލިމަންޓަރީ ގުރޫޕުން ގަރާރެއް ފާސްކޮށްގެން ކަަމަށާ، އެކަން ހުއްޓުވުމަށް ބޭރުގެ އެހީއަށް އެދެން ނިންމި ނިންމުމުގައި ޕާލިމެންޓްރީ ގްރޫޕުގެ ނައިބު ލީޑަރުގެ ހައިސިއްޔަތުން ބޭރުގެ ގައުމުތަކުގެ ލީޑަރުންނަށް ފޮނުއްވެވި ސިޓީގައި ސޮއި ކުރެއްވީ އޭނާ ކަަމަށްވެސް ޝަރީފު ވިދާޅުވިއެވެ. އަދި ނަޝީދުގެ ރޭއްވެވުން ނާކާމިޔާބު ކޮށްލެވުނީ ބޭރުގެ އެހީތެރިކަން ލިބިގެން ކަމަށް ޝަރީފް ވިދާޅުވިއެވެ.

އެ ތުހުމަތުތަކާއި ގުޅިގެން ޝަރީފު ގެ މައްޗަށް އަބުރުގެ ދައުވާކޮށް އޭނާގެ އަތުން 10 މިލިއަން ހޯދަން ރައީސް ނަޝީދުގެ ފަރާތުން މިއަދު ވަނީ ސިވިލް ކޯޓަށް މައްސަލަ ހުށަހަޅުއްވާފައެވެ.