ކުރިއަށް އޮތް ރިޔާސީ އިންތިހާބަށް ސަރުކާރު ހިންގާ މައި ޕާޓީ، އެމްޑީީޕީގެ ފަރާތުން ކުރިމަތިލާނެ ބޭފުޅެއް ކަނޑައެޅުމަށް ބާއްވާ ޕްރައިމަރީ އާއި ގުޅިގެން މުހިންމު ދެ ނުކުތާއެއް އެމްޑީީޕީގެ ރައީސް އަދި ކުރީގެ ރައީސް މުހައްމަދު ނަޝީދުގެ ފާހަގަކުރައްވައިފިއެވެ.
މަޖިލީހުގެ އިދާރާގައި މިހާރު ކުރިއަށްދާ 'އާސްކު ސްޕީކާ"ގެ ހަވަނަ ޕްރޮގްރާމް ގައި ރައީސް ނަޝީދު އެމްޑީޕީ ޕްރައިމަރީގައި ބައިވެރިވަންތޯ އާއި އަދި އެމަނިކުފާނުގެ ކެންޕެއިން ތިނަދޫގައި ލޯންޗު ކުރައްވަން ނިންމެވީ ކީއްވެތޯ މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ އެމްޑީޕީގެ ޕްރައިމަރީގެ ވާހަކަ ދެކެވޭއިރު ދެ ނުކުތާއެއް ފާހަގަކުރައްވަން ބޭނުންފުޅުވާ ކަމަށެވެ.
އެގޮތުން، ޕްރައިމަރީ ގެ ވާހަކަ ދައްކަވާއިރު, 2018 ވަނަ އަހަރުގެ އިންތިހާބަށް އެމްޑީޕީން ވާދަކުރެއްވި އިރު އެކުލަވައިލި މެނިފެސްޓޯ ގައިވަނީ ކީކޭކަން ސާފުކޮށްލަންޖެހޭ ކަމަށް އެމަނިކުފާނު ވިދާޅުވިއެވެ.
"މީގައި ހުރި ވަރަށް ގިނަ ކަންތައްތައް ވަމުންވެސް އެބަދޭ. އެހެންނަމަވެސް، އެމްޑީޕީން، އެމްޑީޕީ މެންބަރުން ގާތުގައި 2018 ވަނަ އަހަރަށް ވީ އެންމެ ބޮޑު ވައުދަކީ ވެރިކަމުގެ ނިޒާމް ބަދަލު ކޮށްދޭނެކަމަށް ވީ ވައުދު. އެ މި މެނިފެސްޓޯގެ 98 ވަނަ ސަފުހާގައި އެބައޮތް. ގާނޫނު އަސާސީ އިސްލާހު ކުރުމަށްފަހުގައި އެކުލަވައިލެވޭ ސަރުކާރުގައި ބޮޑުވަޒީރާއި އޭނާގެ ކެބިނެޓް އެކުލަވައިލެވޭނީ މަޖިލީހުގެ ތެރެއިންނޭ. މިހެން މި ބަދަލު ގެނެވުމުން ސަރުކާރު މަތިބަރުކަން މާ ބޮޑަށް ކުޑަކުރެވިގެންދާނެ. ދައުލަތުގެ ޚަރަދު އިންތިހާއަށް ކުޑަ ވެގެން ދާނެ އެވެ. ރައްޔިތުންނާއި ގާތުން ހިދުމަތްތައް ފޯރުކޮށްދިނުމަށް މަގުފަހިވެގެން ދާނެ."
މަޖިލީހުގެ ރައީސް މުހައްމަދު ނަޝީދު
މިއާއެކު އެމަނިކުފާނު ވިދާޅުވީ، އިސްލާހުކުރެވުނު ގާނޫނު އަސާސީ ތަސްދީގު ކުރުމަށްފަހުގައި އައު ގާނޫނު އަސާސީ ބަޔާންކުރާ ރައީސުލްޖުމްހުރިއްޔާއަށް ގުޅިފައިވާ ޕާޓީތަކުގެ ރައީސް ބަދަލު ވާނެ ކަމަށްވެސް މެނިފެސްޓޯގައި ބުނެފައިވާކަމަށެވެ. އަދިއޭގެ އިތުރުން، ސަރުކާރު ހިންގާނީ އެންމެ ގިނަ، ރައްޔިތުންގެ މަޖިލީހުގެ ގޮނޑި ލިބޭ ޕާޓީ ނުވަތަ ޕާޓީތަކަކުން ކަމަށާއި، ޕާޓީތަކުން ކާމިޔާބު ކުރާ ގޮނޑިތަކުން ޕާޓީތަކަށް އިތުރު ނެޝަނަލިސްޓުން ކަނޑައެޅޭނެ ކަމަށްވެސް މެނިފެސްޓޯގައި ވާކަމަށް ނަޝީދު ވިދާޅުވިއެވެ.
އެހެންކަމުން، އެމްޑީީޕީގެ މެނިފެސްޓޯ ގައި ވަރަށް ސާފުކޮށް އެޕާޓީގެ މެންބަރުން ކައިރީގައި، ވެރިކަމުގެ ނިޒާމް ބަދަލު ކުރަން ފެންނަ ނުފެންނަ ވޯޓަކަށް ދާނެ ކަމަށް ބުނެފައިވާ ކަން ރައީސް ނަޝީދު ވަނީ ފާހަގަކުރައްވާފައެވެ. އަދި ރައީސް އިބްރާހިމް މުހައްމަދު ޞާލިހު އަށް ވެރިކަން ލިބިވަޑައިގެންނެވީވެސް އެ މެނިފެސްޓޯ އާއި އެކުގައި ކަމަށް ނަޝީދު ވިދާޅުވިއެވެ. އަދި ހަމައެހެންމެ، އެމްޑީޕީގެ އިތުރުން ސަރުކާރުގެ ކޯލިޝަންގައި ހިމެނޭ ސަރުކާރައި ގުޅިފައިވާ ޕާޓީތަކުންވެސް އެއްބަސްވެފައިވަނީ، މި ހިނގަމުންދާ ރިޔާސީ ދައުރުގެ ފަހު އަހަރުގައި ރައްޔިތުންގެ ފެންނަ ނުފެންނަ ވޯޓެއް ނަގަން ކަމަށް ވިދާޅުވިއެވެ.
"އަޅުގަނޑު ދެކޭގޮތުގައި، އެމްޑީީޕީ ރިޔާސީ ޕްރައިމަރީއެއްގެ ވާހަކަ ދައްކައިގެން ނުވާނެ، މި ފެންނަ ނުފެންނަ ވޯޓު ނުނަގައެއް. ރައްޔިތުންނަށް ވެފައިއޮތް އެންމެ ބޮޑު ވައުދު." ރައީސް ނަޝީދު ވިދާޅުވިއެވެ.
މިއާއެކު ރައީސް ނަޝީދު ވިދާޅުވީ، މިވަގުތު ރާއްޖެ މިއޮތީ މާލީ ކަންކަން ވަރަށް ދަތި ހާލަތެއްގައި ކަމަށެވެ. އެގޮތުން، ރިޒާވް އިންތިހާއަށް ދަށްވެފައިވާއިރު، ތެލާއި، ބޭސްފަރުވާއާއި، ކާބޯތަކެތީގެ އިތުރުން ދަރަނި ދައްކަންވެސް އިންތިހާއަށް ދަތިވެފައިވާ ކަމަށް ވިދަޅުވިއެވެ.
"އެހެންކަމުން، އަޅުގަނޑު ރިޔާސީ އިންތިހަބާކަށް ދުއްވައިގަތުމުގެ ކުރީގައި، އަޅުގަނޑުގެ ނަޒަރުގައި، މި ދެންނެވި ދެ ނުކުތާ އަށް ވަރަށް ބޮޑަށް އަޅުގަނޑުމެން އެންމެން އެބަ ވިސްނަންޖެހޭ." ރައީސް ނަޝީދު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
