ކުޑަ ރަށެއް، ބޮޑު ރަށެއް ބެއްލެވުމެއްނެތި، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ރަށްރަށަށް ތަރައްގީ ގެންނަވަމުންދާތީ އެކަމާއިމެދު ހަސަދަވެރިވާ ބޭފުޅުންނާއިމެދު ދެވަނަ ފަހަރަށް ވިސްނާލުން ބުއްދިވެރި ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔައުގޫބު ވިދާޅުވެއްޖެއެވެ.
ޔައުޤޫބް މިފަދައިން ވިދާޅުވެފައި މިވަނީ ރައްޔިތުންގެ މަޖިލީހުގެ އިދާރާގައި އިއްޔެ އޮތް "އާސްކް ސްޕީކާ" ޕްރޮގްރާމް ގައި ރައީސް ނަޝީދު އެމްޑީޕީ ޕްރައިމަރީގައި ބައިވެރިވަންތޯ އާއި އަދި އެމަނިކުފާނުގެ ކެންޕެއިން ތިނަދޫގައި ލޯންޗު ކުރައްވަން ނިންމެވީ ކީއްވެތޯ މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ދެއްކެވި ވާހަކަފުޅާއި ގުޅިގެންނެވެ.
އެގޮތުން އެމަނިކުފާނު ވިދާޅުވީ އެމްޑީޕީގެ ޕްރައިމަރީގެ ވާހަކަ ދެކެވޭއިރު ދެ ނުކުތާއެއް ފާހަގަކުރައްވަން ބޭނުންފުޅުވާ ކަމަށެވެ. އެގޮތުން 2018 ވަނަ އަހަރުގެ އެމްޑީީޕީގެ މެނިފެސްޓޯ ގައި ވަރަށް ސާފުކޮށް އެޕާޓީގެ މެންބަރުން ކައިރީގައި، ވެރިކަމުގެ ނިޒާމް ބަދަލު ކުރަން ފެންނަ ނުފެންނަ ވޯޓަކަށް ދާނެ ކަމަށް ބުނެފައިވާ ކަން ރައީސް ނަޝީދު ވަނީ ފާހަގަކުރައްވާފައެވެ. އަދި ރައީސް އިބްރާހިމް މުހައްމަދު ޞާލިހު އަށް ވެރިކަން ލިބިވަޑައިގެންނެވީވެސް އެ މެނިފެސްޓޯ އާއި އެކުގައި ކަމަށް ނަޝީދު ވިދާޅުވިއެވެ.
"އަޅުގަނޑަކަށް ނުފެނޭ ވައުދުތައް ފުދިފައިވާ ކަަމަކަށް، ވައުދުތަކަކީ މި ދެންނެވިހެން އެޔެއް މިޔެއް ބަލާނުލައި ކުޑަ ރަށެއް ބޮޑު ރަށެއް ބަލާނުލައި ކަންކަން ކުރައްވަމުން ދިއުމެއް ނޫން، މި މެނިފެސްޓޯގައި އަޅުގަނޑުމެން ވެފައި އެބަހުރި ވަރަށް ހާއްސަ ކަންކަމެއް، ވަކި އިރެއްގައި ވަކި ގޮތަކަށް ކުރާނެ ކަންތައްތަކެއް،"
"އަޅުގަނޑު ދެކޭގޮތުގައި، އެމްޑީީޕީ ރިޔާސީ ޕްރައިމަރީއެއްގެ ވާހަކަ ދައްކައިގެން ނުވާނެ، މި ފެންނަ ނުފެންނަ ވޯޓު ނުނަގައެއް. ރައްޔިތުންނަށް ވެފައިއޮތް އެންމެ ބޮޑު ވައުދު." ރައީސް ނަޝީދު ވިދާޅުވިއެވެ.
ރައީސް ނަޝީދު މި ވާހަކަތަކަށް ރައްދު ދެއްވަމުން ޔައުގޫބު ވިދާޅުވީ, ނިޒާމީ ވޯޓެއް މީގެ ކުރިންވެސް ނަގާފައިވާ ކަމަށާ، އެފަހަރު ރައްޔިތުން ނިންމީ ރާއްޖޭގައި ރިޔާސީ ނިޒާމެއް އޮންނަން ކަމަށެވެ. އެހެންކަމުން، އަނެއްކާ އަލުން އެ ވޯޓު ނުނެގުމަކީ ވައުދު ނުފުއްދުން ނޫން ކަމަށްވެސް އޭނާ ވިދާޅުވިއެވެ.
"ކުޑަ ރަށެއް، ބޮޑު ރަށެއް ނުބަލާ، ރަށް ރަަށަށް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ތަރައްގީ ގެނެސްދޭތީ އެކަމާއި ހަސަދަވެރިވާ ބޭފުޅުންނާއިމެދު ދެފަހަރަށް ވިސްނާލުން ބުއްދިވެރި" ޔައުގޫބް ވިދާޅުވިއެވެ.
އިއްޔެ އޮތް އާސްކް ސްޕީކާ ޕްރޮގްރާމް ގައި ރައީސް ނަޝީދު ވަނީ ރައީސް ޞާލިހުގެ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ރައީސް ޞާލިހު ވައުދުތައް ފުއްދަވަން މަސައްކަތް ނުކުރައްވާ ކަމަށާއި މަސައްކަތް ކުރައްވަނީ ބާރުތައް ޖަމާކުރެއްވުމަށް ކަމަށްވެސް ނަޝީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
