2021 ވަނަ އަހަރުގެ ނިޔަލަށް ސޮވްރިން ފަންޑުގައި 2 ބިލިއަން ރުފިޔާ ހުރިކަމަށް ސަރުކާރުން ބުނި ނަމަވެސް، އެ އަދަދަށް އެ ފަންޑުގައި ފައިސާ ހުރިކަން ކަށަވަރު ނުވާކަމަށް އޮޑިޓާ ޖެނެރަލް އޮފީހުން ބުނެފިއެވެ.
އޮޑިޓު އޮފީހުން ޝާއިއުކޮށްފައިވާ 2021 ވަނަ އަހަރުގެ ސަރުކާރުގެ މާލީ ހިސާބުތަކުގެ އޮޑިޓު ރިޕޯޓުގައި ވާ ގޮތުން 31 ޑިސެންބަރު 2021 ވަނަ ދުވަހުގެ ނިޔަލަށް ސޮވްރިން ފަންޑުގައި ދެ ބިލިއަން ތިރީސް ހަތް މިލިއަން ހަތަރުލައްކަ އަށްޑިހަ ފަސްހާސް ނުވަސަތޭކަ އަށާވީސް ރުފިޔާ ހުރިކަމަށް ދައުލަތުގެ މާލީ ހިސާބުތަކުން ދައްކައެވެ.
އެހެން ނަމަވެސް އެއީ އެ ފަންޑުގައި ހުރި ފައިސާއިން އިންވެސްޓުކުރި ފައިސާއާއި، އެ އިންވެސްޓުމެންޓުން ލިބޭނެކަމަށް ބަލާ ފައިސާގެ އިތުރުން އެ އިންވެސްޓުމެންޓުގެ ފައިދާގެ ގޮތުގައި ލިބޭނެކަމަށް ބެލެވޭ ފައިސާ ހިމަނައިގެން ޖަހާފައިވާ ޖުމްލަ އަދަދެއްކަން އޮޓިޓް ރިޕޯޓުން ވަނީ ފާހަގަކޮށްފައެވެ.
އެހެންކަމުން ދައުލަތުގެ ސްޓޭޓުމެންޓު އޮފް އެސެޓްސްގައި ސޮވެރިން ޑިވެލޮޕްމެންޓު ފަންޑުގައި 2 ބިލިއަން ރުފިޔާ ހުރިކަމަށް ބުނެފައިވީ ނަމަވެސް އެ އަދަދަކީ ޞައްޙަ އަދަދެއްކަން ޔަގީންނުކުރެވޭކަމަށްވެސް އޮޑިޓު އޮފީހުން ވަނީ ހާމަކޮށްފައެވެ.
އޭގެ އިތުރުން ރައީސް ޔާމީނުގެ ވެރިކަމުގައި 2016 ވަނަ އަހަރުގައި އެސްޑީއެފް ޤާއިމުކުރުމާ ގުޅޭ ގޮތުން އެކުލަވައިލި ކެބިނިޓު ކަރުދާހުގައި އަދި ޔޫތު އެންޑް އެކޮނިމިކް ކައުންސިލުން ނިންމާފައިވާ ނިންމުމުގައި ބަޔާންކުރި ގޮތަށް އެސްޑީއެފް ހިންގުމާ ބެހޭ އުސޫލުތަކާއި ހަމަތައް އަދިވެސް އެކުލަވައިލާފައިނުވާކަން އޮޑިޓް އޮފީހުގެ އެ ރިޕޯޓުގައި ވަނީ ބަޔާންކޮށްފައެވެ.
ސޮވްރިން ޑިވެލޮޕްމަންޓު ފަންޑަކީ ރާއްޖޭގައި ތަރައްގީގެ ބިޔަ މަޝްރޫއުތައް ހިންގުމަށް ބޭރުން ނަގާ ދަރަނި އަނބުރާ އަދާކުރުމަށް ކުރީގެ ރައީސް ޔާމީން އަބްދުލްގައްޔޫމުގެ ވެރިކަމުގައި 2017 ވަނަ އަހަރު އުފައްދަވާފައިވާ ފަންޑެކެވެ.
އެމަނިކުފާނުގެ ވެރިކަން ބަދަލުވުމާއެކު، މި ސަރުކާރުން ވަނީ ސޮވްރިން ފަންޑުގައި ހުރި ޑޮލަރު ދިވެހި ރުފިޔާއަށް މާރުކޮށްފައެވެ. އެފަހުން، އަނބުރާ އެ ފަންޑަށް ޑޮލަރު ޖަމާކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
