ހުޅުމާލޭގައި ދިރިއުޅޭ ރައްޔިތުންނާއި ހުޅުމާލެ އެކި ބޭނުންތަކަށް ޒިޔާރަތް ކުރާ ފަރާތްތަކަށް ދެވޭ ޙިދުމަތުގެ ފެންވަރު ރަނގަޅު ކުރުމަށް އެޗް.ޑީ.ސީގެ އިންސްޕެކްޓަރުންނާއި ސުޕަވައިޒަރުންނަށް ޙާއްސަ ޓްރޭނިންގ ސެޝަންއެއް މިއަދު ފަށައިފިއެވެ.
ހުޅުމާލޭގައި ދިރިއުޅޭ ރައްޔިތުންނާއި ހުޅުމާލެ އެކި ބޭނުންތަކަށް ޒިޔާރަތް ކުރާ ފަރާތްތަކާއި އެއްމެ ގާތުން މަސައްކަތްތަކުރާ އެއް ބަޔަކީ އެޗް.ޑީ.ސީގެ ސުޕަވައިޒަރުންނާއި އިންސްޕެކްޓަރުންގެ ޓީމެވެ. މިގޮތުން، ރަށު ތަރެ ބެލެހެއްޓުމާއި އެކި ގޮތްގޮތުން ދިމާވާ މައްސަލަތައް ހައްލުކޮށް ރައްޔިތުންނަށް ގިނަ ޙިދުމަތްތަކެއް މި ޓީމުތަކުން ދަނީ ދެމުންނެވެ.
އެޗްޑީސީން ބުނީ، އެ ޓީމުން މިހާރު ދެމުން ގެންދާ ޙިދުމަތްތަކުގެ ފެންވަރު އިތުރަށް ރަނގަޅު ކުރެވި، ރައްޔިތުންނާއި ވީހާވެސް ގާތުން މަސައްކަތް ކުރުމަށް އެޗް.ޑީ.ސީ އާ ނެޝަނަލް ކޮލެޖް ފޯ ޕޮލިސިންގ އެންޑް ލޯ އެންފޯސްމަންޓާއި ގުޅިގެން 8 ދުވަހަށް ކުރިއަށް ގެންދެވޭ ޙާއްސަ ޓްރޭނިންގ ޕްރޮގްރާމް މިއަދު ފަށާފައިވާ ކަމަށެވެ.
އެޗް.ޑީ.ސީގެ އިންސްޕެކްޓަރުންނާއި ސުޕަވައިޒަރުންނަށް ކުރިއަށް ގެންދާ ޙާއްސަ ޓްރޭނިންގ ސެޝަންގެ ތެރެއިން--ފޮޓޯ/އެޗްޑީސީ
މި ތަމްރީން ޕްރޮގްރާމްގައި ރަށުތެރެ ބެލެހެއްޓުމުގައި ގެންގުޅެން ޖެހޭ އެއްމެ ރަނގަޅު ގޮތްތަކާއި، މުޢާމަލާތު ކުރުން، މައްސަލަތައް ހައްލު ކުރުން، ސެލްފް ޑިފެންސް އަދި ޤާނޫނުތަކާއި ޤަވައިދުތަކަށް ބައިވެރިން އަހުލުވެރި ކުރުމަށް ސެޝަންތައް ބޭއްވިގެން ދާނެ ކަމަށް އެ ކޯޕަރޭޝަނުން ބުނެއެވެ.
އެޗް.ޑީ.ސީގެ މެންޑޭޓްގެ ތެރޭގައި ހުޅުމާލެ ބެލެހެއްޓުން ހިމެނިފައި ވާއިރު، ރައްޔިތުންނަށް ދެވޭ ޙިދުމަތްތަކާއި މި ކުންފުންޏާއި ރައްޔިތުންނާއި އޮންނަ ގުޅުން އިތުރަށް ރަނގަޅު ކުރުމަށް ގިނަ މަސައްކަތްތަކެއް އެ ކޯޕަރޭޝަނުން ކުރަމުންދާކަމަށާ، ރައްޔިތުންނާއި އެއްމެ ގާތުން ޙިދުމަތް ދިނުމަށް ކަނޑައެޅިފައިވާ ޓީމްތަކަށް މިފަދަ ޓްރެއިންގްތައް ދިނުމަކީ ޙާއްސަ އިސްކަމެއް ދޭނެ ކަމެއް ކަަމަށް ވެސް އެ ކޯޕަރޭޝަނުން ބުނެއެވެ.
Advertisement
This content is created and paid for by advertisers and does not involve Voice Journalists
