ތަކެތީގެ އަގުތައް މިހާރު އަންނަނީ އިންތިހާއަށް މައްޗަށް އުފުލެމުންނެވެ. އެހެންކަމުން ފަރާޓާ ފަދަ ތަކެތި ގަނެގެން ކެއުން މިވަނީ އަތުން އެތައް ޚަރަދެއް ދާ ކަމަކަށްވެފައެވެ. އެހެންކަމުން 'ވޮއިސް'ގެ ބަދިގެއިން މި ގެނެސްދެނީ މާ ބޮޑު ޚަރަދެއް ނުކޮށް މީރުކޮށް ގޭގައި ފަރާޓާ ތައްޔާރު ކޮށްލާނެ ގޮތެކެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ. 

3 ޖޯޑު ފުށް

1 ބިސް

1 ސައި ސަމުސާ ހަކުރު

1 ސައިސަމުސާ ބޭކިންގ ޕައުޑަރ

1/2 ސައި ސަމުސާ ލޮނު

2 މޭޒުމަތީ ސަމުސާ ކުކިންގ އޮއިލް
ތާފަނާ ފެން 
8 މޭޒުމަތީ ސަމުސާ ގިތެޔޮ ނުވަތަ އޮލިވް އޮއިލް (ފަރާޓާ ފިހާއިރު އުނގުޅަން) 
8 ބަޓަރ ޕޯޝަން/ 8 މޭޒުމަތީ ސަމުސާ ގިތެޔޮ (ފަރާޓާ ތައްޔާރު ކުރާއިރު އުނގުޅަން)

1) ބޭކިންޕައުޑަރު އެއްކޮށްގެން ފުރާނައިފައިވާ ފުށާއި، ހަކުރާއި، ލޮނާއި، ކުކިންގ އޮއިލް އާއި ކުކުޅުބިސް އެއްކުރުމަށް ފަހު، ފެން އަޅައިގެން މޮޑެލާށެވެ. 

2) ރަނގަޅަށް ފުށްގަނޑާ އެކުވީމައި، ފުށްގަނޑު އެއްޗަކަށް ލާފައި އޭގެ މަތިޖަހައިފައި، ވިހި މިނެޓު ވަންދެން ފުށްގަނޑު ބަހައްޓާށެވެ. 

3) ވިހި މިނެޓު ފަހުން، އަނެއްކާ ވެސް މޮޑެފައި އަށް ގުޅައަށް ބައި ކުރުމަށްފަހު ދެމޭ އެންމެ ތުނިކޮށް ރޮށި ދަމާ ގޮތަށް ދަމާލާށެވެ. 

4) ދެން އެ ދެމި ފަރާޓާ މަތީގައި ބަޓަރ ޕޯޝަންއެއް ނުވަތަ 1 މޭޒުމަތީ ސަމުސާ ގިތެޔޮ ހާކާލާށެވެ. އެއަށްފަހު އޭގެ މަށްޗަށް ހިކި ފުށްކޮޅެއް ބުރުވާލާށެވެ.

5) ދެން، އޭގެ މެދުގައި ލޯވަޅެއް އަޅައިފައި އެތެރެއިން ބޭރަށް ވައްކޮށް އޮޅާލާށެވެ.

6) އެއްކޮށް އޮޅައި ނިމުމުން، އުޅާލި ހަދާ ގޮތަށް ވައްކޮށް އޮޅައިލާށެވެ. 

7) ދެން ބޭނުންވާ ސައިޒަކަށް (ރޮށިދަމާ އެތީގައި) ފަރާޓާ ދަމައިލާށެވެ.

8) އެއަށްފަހު ރޮށި ފިހާ ތަވާ މަތީގައި، ގިތެޔޮ ސަމުސަލެއް ނުވަތަ އޮލިވް އޮއިލް ސަމުސަލެއް ހާކާލުމަށް ފަހު، ފަރާޓާ ފިހެލާށެވެ.