ފީފާ ވޯލްޑް ކަޕްގައި ރޭ ޕެނަލްޓީ ޖަހައިގެން ގަދަފަދަ ސްޕެއިން ބަލިކޮށް މޮރޮކޯ އިން ވޯލްޑް ކަޕްގެ ކުއާޓާ ފައިނަލުން ވަނީ ފުރުސަތު ހޯދައިފައެވެ.

ރޭ ކުޅެވުނު މެޗު ނިމުނު އިރުވެސް އެއްވެސް ޓީމަކަށް ގޯލު ޖެހިފައި ނުވާއިރު އިތުރު ވަގުތު ކުޅެގެންވެސް އެކަން ވާގޮތް ވަނީ ނުވެފައެވެ. އެހެންކަމުން، ދެން މެޗުން މޮޅުވާ ޓީމެއް ކަނޑައެޅީ ޕެނަލްޓީ ޖަހައިގެންނެވެ. އެގޮތުން ޕެނަލްޓީ ޖަހައިގެން މޮރޮކޯއިން ސްޕެއިން ގެ މައްޗަށް ކުރި ހޯދީ 3-0 ގެ ނަތީޖާއިންނެވެ. އެއާއެކު މޮރޮކޯ ވެގެން ގޮސްފައިވަނީ ވޯލްޑްކަޕް ގައި ކުއާޓާ ފައިނަލުން ޖާގަ ހޯދި ފުރަތަަމަ މުސްލިމު ގައުމަށެވެ. 

ރޭގެ މެޗުން މޮރޮކޯ މި ހޯދި ތާރީޚީ ކާމިޔާބީ އަށްފަހު އެ ގައުމުގެ ޓީމުންވަނީ ވަރަށް ވެސް ތަފާތު އިތުރު ކަމެއްވެސް ދައްކުވާލާފައެވެ. އެގޮތުން މެޗުން ހޯދި ކާމިޔާބީއަށްފަހު އެ ޓީމުން ފޮޓޯ އަށް ހުއްޓުނު ކުޅުންތެރިން ތިބީ ފަލަސްޠީނުގެ ދިދަވެސް ހިފައިގެންނެވެ. 

Advertisement

މިއީ ގިނަ ބަޔަކު ހައިރާންވެސް ކޮށްލި ކަމަކަށްވެގެން ދިޔައިރު، އެފަދައިން ކަން ކުރެވޭނީ ވަރަށްވެސް ހިތްވަރު ހުރެގެން ކަމަށް މީހުން ބުނެފައި ވެއެވެ. އެހެނީ، "ސިޔާސީ" ކަންކަން ފުޓުބޯޅައިގެ ތެރެއިން ޕްރޮމޯޓް ކުރުމަށް ދިދަ އާއި، ބެނާއާއި އެނޫންވެސް ތަކެތި ދަމައި ދައްކައި ހެދުމަކީ ފީފާގެ ގަވައިދުތަކާއި ޚިލާފްކަމެކެވެ. އަދި އެ ގޮތަށް ފަލަސްތީނުގެ ދިދަ ދެއްކުމުގެ ސަބަބުން މީގެ ކުރިން ބައެއް ޓީމުތައް ޖޫރިމަނާވެސް ކޮށްފައިވެއެވެ. 

މީގެ ކުރިން ކެނެޑާއާއި ބައްދަލު ކުރި މެޗަށްފަހުވެސް މޮރޮކޯގެ ކުޅުންތެރިން ފަލަސްތީނުގެ ދިދަ ވިހުރުވާފައިވެއެވެ. އެއާއި ގުޅިގެން މިހާތަނަށް އެޓީމާއި މެދު އެއްވެސް ފިޔަވަޅެއް އަޅާފައެއް ނުވެއެވެ. 

މިފަހަރު ވޯލްޑްކަޕު ވެގެން ގޮސްފައި މިވަނީ ވަރަށް ގިނަ ގޮތްގޮތުން ފަލަސްތީނުގެ ރައްޔިތުންނަށް ޚާއްސަ ވޯލްޑްކަޕަކަށެވެ. އެގޮތުން، ވޯލްޑްކަޕު ގެ ސްޓޭޑިއަމް ތެރެއިންނާއި، މުޅި ގަތަރު ތެރެއިންވެސް ފަލަސްޠީނުގެ ހައްގުގައި ގިނަ ބަޔަކު އަޑު އުފުލައި، އެގައުމުގެ ރައްޔިތުންގެ އަޑު ދުނިޔެއަށް އިއްވަމުން ދާކަން ފާހަގަ ކުރެވެއެވެ.