ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ) މައްޗަށް އަބުރުގެ ދައުވާކޮށް އޭނާގެ އަތުން 10 މިލިއަން ހޯދަން ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު، ސިވިލް ކޯޓަށް ހުށަހެޅި މައްސަލަ އެ ކޯޓުން ބަލައިގެންފިއެވެ. 

ރައީސް މައުމޫންގެ ވެރިކަމުގައި، ބޮމެއް ގޮއްވާލާ 50 ވުރެ ގިނަ މީހުން މަރާލުމަށް ފަހު އެކަން މައުމޫންގެ ބޮލުގައި އެޅުވުމަށް ނަޝީދު އިސްވެ ރޭއްވެވި ކަމަށް ޝަރީފް ވަނީ ތުހުމަތުކުރައްވާފައެވެ. އަދި އެކަން ހުއްޓުވީ އެމްޑީޕީގެ ޕާލިމަންޓަރީ ގުރޫޕުން ގަރާރެއް ފާސްކޮށްގެން ކަަމަށާ، އެކަން ހުއްޓުވުމަށް ބޭރުގެ އެހީއަށް އެދެން ނިންމި ނިންމުމުގައި ޕާލިމެންޓްރީ ގްރޫޕުގެ ނައިބު ލީޑަރުގެ ހައިސިއްޔަތުން ބޭރުގެ ގައުމުތަކުގެ ލީޑަރުންނަށް ފޮނުއްވެވި ސިޓީގައި ސޮއި ކުރެއްވީ އޭނާ ކަަމަށްވެސް ޝަރީފު ވިދާޅުވިއެވެ. އަދި ނަޝީދުގެ ރޭއްވެވުން ނާކާމިޔާބު ކޮށްލެވުނީ ބޭރުގެ އެހީތެރިކަން ލިބިގެން ކަމަށް ޝަރީފް ވިދާޅުވިއެވެ.

ޝަރީފްގެ އެ ތުހުމަތު ތަކާއި ގުޅިގެން ރައީސް ނަޝީދު، ޝަރީފްގެ މައްޗަށް އަބުުރުގެ ދައުވާކުރަން ސިވިލް ކޯޓަށް ވަނީ ހުށަހަޅުއްވާފައެވެ.

Advertisement

އެގޮތުން ހުށަހެޅި މައްސަލަ އާއި ގުޅިގެން ނަޝީދުގެ ވަކީލުންގެ ޓީމުން ބުނީ، އެ މައްސަލަ ހުށައެޅުއްވީ އެއްޗެއް ގޮއްވާލާ އެތައް ބަޔަކު މަރާލައި ގަތުލު އާންމެއް ހިންގަން އެމަނިކުފާނު އުޅުނުކަމަށް ބުނެ މެންބަރު ޝަރީފް، މިމަހުގެ 25 ވަނަ ދުވަހު ޝާއިއުކޮށްފައިވާ ޓްވީޓެއްގައި، ރައީސް ނަޝީދުގެ އަބުރާ ބެހި، އަބުރަށް ގެއްލުން ލިބޭގޮތަށް ވާހަކަ ދައްކާފައިވާތީ ކަމަށެވެ.  

އެހެންކަމުން މެންބަރު ޝަރީފުގެ ކިބައިން، އަބުރާ ބެހުމުގެ އަމަލެއް ހިންގާފައިވާކަމަށް ކަނޑައަޅައިދެއްވައި، އަބުރާ ބެހުމުގެ ސަބަބުން ލިބުނު ގެއްލުމުގެ ބަދަލެއްގެ ގޮތުގައި 10 މިލިއަން ރުފިޔާ ނަގައި ދިނުމަށް މިއަދު ސިވިލް ކޯޓުގައި ދައުވާ އުފުލައިފާ ކަމަށް ވެސް އެމަނިކުފާނުގެ ވަކީލުން ބުނެފައިވެއެވެ. 

މި މައްސަލަ ނަޝީދުގެ ފަރާތުން ހުށަހެޅުއްވީ ނޮވެމްބަރު މަހުގެ 28 ވަނަ ދުވަހުއެވެ. އަދި އެ މައްސަލަ ވަނީ އިއްޔެގެ ވަގުތެއްގައި ސިވިލް ކޯޓުން ބަލައިގެންފައެވެ.