ހުޅުމާލޭގައި، ވޭން އަކުން ހިނގާފައި ދިޔަ ބައެއް ގައިގައި ޖެހި ނުރައްކާތެރި އެކްސިޑެންޓެއް ހިނގައިފިއެވެ. 

ފުލުހުން ދާދި ދެންމެއަކު ބުނީ، ހުޅުމާލޭ ހޮސްޕިޓަލުގެ އެމެޖެންސީ ޓްރާންސްޕޯޓް ފަޅިން ދުއްވާފައި ނުކުތް ވޭން އެއް ކޮންޓްރޯލް އިން ނެއްޓިގެންގޮސް، ބޯގަންވިލާ މަގުގެ ޕޭވްމަންޓް މަތީގައި ތިބި ތިން މީހެއްގެ ގައިގައި ޖެހުމަށްފަހު، ބޯގަންވިލާ މަގާއި ވީ ފަޅިން 168 ނަންބަރު ފުލެޓްގެ އިރުމަތީ ފަރާތު ފާރު ކަނުގައި ޖެހި އެކްސިޑެންޓް ވެފައިވާ ކަމުގެ މައުލޫމާތު މިއަދު 15:40 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. 

އަދި މިއެކްސިޑެންޓްގައި ވޭން ދުއްވި ޑްރައިވަރާއިއެކު ޖުމުލަ ހަތަރު މީހަކަށް އަނިޔާވެފައިވާ ކަމަށާއި، އޭގެ ތެރޭގައި 3 ދިވެހި އަންހެނުންނާއި، ދިވެހި ފިރިހެނެއް ހިމެނޭ ކަމަށްވެސް ފުލުހުން ބުނެފައިވެއެވެ. 

Advertisement

މީގެ އިތުރުން، ވޭން ދުއްވަން އިނީ އެއްގަމު އުޅަނދު ދުއްވުމުގެ އެ ކެޓަގަރީގެ ލައިސެންސް އޮންނަ މީހެއް ކަމަށް ފުލުހުން ބުނެފައިވެއެވެ. 

އަދި މި މައްސަލަ ފުލުހުން ތަހުގީގު ކުރަމުންދާ ކަމަށްވެސް ފުލުހުން ބުނެފައިވެއެވެ.