ފަލަސްތީނަށް އިޒްރޭލުން ދެމުންދާ ހަމަލާތައް ހުއްޓުވާ ޔަހޫދީންގެ އަޅުވެތިކަމުން ފަަސްތީނު މިނިވަން ކުރުމަށް ޗައިނާއިން ތާއީދު ކުރައްވާކަމަށް އެ ގައުމުގެ ރައީސް ޝީ ޖިންގްޕިން ވިދާޅުވެއްޖެއެވެ. 

ޗައިނާއިގެ ރައީސް ޝީ ޖިންގްޕިން މިފަދައިން ވިދާޅުވެފައިވަނީ ގަލްފްގެ ޤައުމުތަކާއި ޗައިނާއާ ދެމެދު ގުޅުން ބަދަހިކުރުމުގެ މަޝްވަރާތައް ކުރުމަށް ސަޢޫދީ ޢަރަބިއްޔާގައި ބޭއްވި ސަމިޓެއްގައި ވާހަކަފުޅު ދައްކަވަމުންނެވެ. 

އޭނާ ވިދާޅުވީ، ފަލަސްތީނަކީ މިނިވަން ދައުލަތެއްގެ ގޮތުގައި ހެދުމަށް ބައިނަލްއަގުވާމީ މައިދާނުގެ ފުރިހަމަ ތާއީދު ލިބެން ޖެހޭކަމަށެވެ.

އަދި އެތަނުގައި ޔަހޫދީން ހިންގަމުންދާ ލާއިންސާނީ އަމަލުތައް ހުއްޓުވާ އެ ގައުމަށް ތަރައްގިއާއިފާގަތިކަން ލިބޭނެ ހުރިހާ މަގުތަކެއް ހޯދުމަށް ބައިނަލް އަގުވާމީ މަޝްރަހުގެ ތާއީދު ފުރިހަމަޔަށް ދޭން ޖެހޭކަމަށް ގަބޫލުކުރައްވާކަމަށެވެ. 

ފަލަސްތީނަކީ މިނިވަން ދައުލަތެއްގެ ގޮތުގައި ހެދުމަށް ބައިނަލް އަގުވާމީ މަޝްރަހުން ގެންގުޅޭ ވިސްނުން ބަދަލުކޮށްގެން ނުވާނެކަމަށާއި، އެ މަގަށް އެ މައްސަލަ ގެންދިއުމަށް ކުރެވެން ހުރި ހުރިހާ މަސައްކަތެއް ކުރަން ޖެހޭކަމަށްވެސް އޭނާ ވިދާޅުވިއެވެ. 

އޭގެ އިތުރަށް ޝީ ވަނީ ފަލަސްޠީނަށް އ.ދ.ގެ މެންބަރުކަން ދީ، 1967ވަނަ އަހަރުގެ އެއްބަސްވުމާ ގޮތަށް، ފަލަސްޠީނުގެ މިނިވަން ދަޢުލަތެއް ޤާއިމުކޮށްދިނުމަށް ގޮވާލައްވާފައެވެ. 

ޔަހޫދީންގެ ފަލަސްޠީނުގެ ބިންތަކަށް ވެރިވެގަނެފައި ވަނީ 1967ވަނަ އަހަރު ކުރި މެދުއިރުމަތީގެ ހަނގުރާމައިގައެވެ. މި ހަނގުރާމައިގައި ޔަހޫދީންގެ ދަޢުލަތުން ވަނީ ހުޅަނގު އައްސޭރިއާއި އިރުމަތީ ޤުދުސްގެ އިތުރުން ޣައްޒާއަށް އަތްގަދަކޮށްފައެވެ.

ވެރިވެގަނެފައިވާ ފަލަސްޠީނުގެ ބިންތަކުގައި ޔަހޫދީން ވަޒަންވެރި ކުރުވުމަށް އިސްރާޢީލުން ދަނީ ގިނަ މަސައްކަތްތަކެއް ކުރަމުންނެވެ. އެ ބިންތަކުގައި މިހާރު ވެސް 500,000އަށްވުރެ ގިނަ ޔަހޫދީން ދަނީ ދިއިރުޅެމުންނެވެ.

އަދި ހުޅަނގު އައްސޭރީގައި ދިރިއުޅޭ 3 މިލިޔަނަށްވުރެ ގިނަ ފަލަސްޠީނުގެ ރައްޔިތުން ދިރިއުޅެމުން ދަނީ ޔަހޫދީ ސިފައިންގެ އަޅުވެތިކަމުގެ ދަށުގައެވެ.