މިދިޔަ މަހު މާލެ ސަރަހައްދުގައި ފުލުހުން ހިންގި ޚާއްސަ އޮޕަރޭޝަނެއްގައި އަތުލާގަތް 13 ކިލޯގެ މަސްތުވާތަކެތީގެ މައްސަލާގައި ހައްޔަރުކުރި މީހުންގެ ތެރެއިން އެކަކު ޝަރީއަތް ނިމެންދެން ބަންދުގައި ބެހެއްޓުމަށް ޢަމުރުކޮށްފިއެވެ.
ފުލުހުން މިދިޔަ މަހުގެ 17 ވަނަ ދުވަހުގެ ރޭ، މާލެ އާއި ހުޅުމާލޭގައި ހިންގި އޮޕަރޭޝަންގައި 13.56 ކިލޯގެ ޑްރަގާއި 644،020 ރުފިޔާ އަތުލައިގަނެފައިވެއެވެ.
މިމައްސަލާގައި 6 މީހަކު ފުލުހުންގެ ބެލުމުގެ ދަށަށް ގެންގޮސްފައިވާއިރު އެ ހަ މީހުންގެ ބަންދަށް ކްރިމިނަލް ކޯޓުން އެންމެ ފުރަތަމަ ދިނީ 15 ދުވަހެވެ.
އަދި އެ މީހުންގެ ބަންދުގެ މުއްދަތު ހަމަވެ، މުއްދަތު ޖެހުމަށް ކޯޓަށް ގެންދިއުމުން ވަނީ މީގެ ތެރެއިން އެއަކު ޝަރީއަތް ނިމެންދެން ބަންދުކުރުމަށް ޢަމުރުކޮށްފައެވެ. އަދި އަނެއް ފަސްމީހުން 30 ދުވަހަށް ބަންދުގައި ބޭތިއްބުމަށް ވަނީ މުއްދަތު ދީފައެވެ. މިއެންމެންނަކީވެސް ދިވެހި ފިރިހެނުން ކަމަށް ފުލުހުން ބުނެފައިވެއެވެ.
ފުލުހުން ހިންގި މި އޮޕަރޭޝަންގައި މަސްތުވާތަކެއްޗާއި ފައިސާ ހޯދާފައިވަނީ މާލޭގެ 2 ގެއަކާއި ހުޅުމާލޭގެ ގެސްޓް ހައުސްއެއް ބަލާ ފާސްކުރުމަށްފަހުއެވެ.
Advertisement
This content is created and paid for by advertisers and does not involve Voice Journalists
