ޕޮލިސް ބޯޑުން ހުސްވެފައިވާ ގޮނޑިއަށް ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އައްޔަނުކުރައްވައިފި އެވެ.

ކުރީގެ ރައީސް މުހައްމަދު ނަޝީދުގެ ވެރިކަމުގައި ކޮމިޝަނާ އޮފް ޕޮލިސްގެ މަގާމު އަދާކުރެއްވި ފަސީހު ޕޮލިސް ބޯޑަށް އައްޔަން ކޮށްފައި މިވަނީ އެ ބޯޑުގެ ރައީސްގެ މަގާމުގައި ހުންނެވި މއ. މަނާގެ، އަލީ ފާއިޒު, ދިވެހި ރާއްޖެއިން ސްރީ ލަންކާއަށް ކަނޑައަޅުއްވާ ސަފީރުކަމުގެ މަގާމަށް އައްޔަނުކުރުމާ ގުޅިގެންނެވެ. ފާއިޒު އެ މަގާމަށް އައްޔަނުކުރުމަށް މަޖިލީހުން ފާސްކުރީ މިދިޔަ މަހުގެ 28 ވަނަ ދުވަހު އެވެ.

2012 ވަނަ އަހަރު ނަޝީދު އިސްތިއުފާ ދެއްވި އިރުވެސް ޕޮލިސް ކޮމިޝަނަރު ގެ މަގާމުގައި ހުންނެވީ ފަސީހު އެވެ. އޭގެ ފަހުން އޭނާ ވަނީ އެމްޓީސީސީގެ ޑެޕިއުޓީ ސީއީއޯކަން ވެސް ކުރައްވާފަ އެވެ.

ފަސީހު ޕޮލިސް ބޯޑަށް އައްޔަން ކޮށްފައިވާއިރު، އެ ބޯޑުގެ ރައީސް އަކު އަދިވެސް ކަނޑައަޅާފައެއް ނުވެއެވެ.  

ފުލުހުންގެ ގާނޫނުގެ 78 ވަނަ މާއްދާ ބުނާ ގޮތުން ބޯޑުގެ ރައީސް އަކީ ބޯޑުގެ މެންބަރުންގެ މެދުގައި ވޯޓު ނަގައިގެން ހޮވޭ މަގާމެކެވެ. ނަމަވެސް ރައީސްގެ މަގާމު ހުސްވުމުން އެ މަގާމަށް ބޭފުޅަކު އިންތިހާބުކުރަންޖެހޭ މުއްދަތެއް އެ ގާނޫނުގައި ބަޔާންކޮށްފައެއް ނުވެ އެވެ.