ގއ. މާމެންދޫގެ އުތުރު ފަރާތުގެ ރަށް ގިރުމުގެ މައްސަލައަށް ސަރުކާރުން ހައްލެއް ހޯދައިދީފައިނުވާތީ އެކަން ސަރުކާރުގެ ސަމާލުކަން ގެނައުމަށް އެ ރަށު ކައުންސިލްގެ މި ދައުރުގެ 78 ވަނަ ޖަލްސާ ރަށް ގިރާ ސަރަހައްދުގައި ބާއްވައިފިއެވެ.
މާމެންދޫ ކައުންސިލްގެ އެ ޖަލްސާ ކައުންސިލްގެ ޕޭޖުން ވަނީ ލައިވްވެސް ކޮށްފައެވެ.
މި ޖަލްސާގައި ވާހަކަފުޅުދައްކަވަމުން މާމެންދޫ ކައުންސިލްގެ ރައީސް އަހްމަދު އަޒީޒް ވިދާޅުވީ، ޖަލްސާ އެ ސަރަހައްދުގައި ބާއްވާފައިވަނީ އެ ރަށަށް ދިމާވެފައިވާ ރަށް ގިރުމުގެ މައްސަލަ ރައީސުލްޖުމުހުރިއްޔާގެ ސަމާލުކަމަށް ގެނައުމަށެވެ. އެގޮތުން އެ މައްސަލަ ސަރުކާރުގެ ސަމާލުކަމަށް ގެނައުމަށް ކުރެވެން ހުރި މަސައްކަތެއް ކައުންސިލުން ކުރާނެކަމަށް އޭނާ ވިދާޅުވެފައިވެއެވެ.
މީގެ އިތުރުން އޭނާ ވިދާޅުވީ، ރަށް ގިރުމުގެ މައްސަލަ ސަރުކާރަށް އެތައްފަހަރެއްގެ މަތތިންހުށަހެޅިފަިއވާކަމަށާއި ނަމަވެސް އެކަމަށް އެއްވެސް ހައްލެއް ލިބިފައި ނުވާކަމަށެވެ.
މިއާއެކު އޭނާ ވަނީ، މިދިޔަ އަހަރުގެ މާޗް މަހުގެ ތެރޭގައި އޭރުގެ އެންވަރަމެންޓް މިނިސްޓަރު އަދި މިހާރުގެ ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން މާމެންދޫއަށް ކުރެއްވި ދަތުރުފުޅެއްގައި އެ ސަރަހައްދު ބައްލަވާލައްވާފައިވާކަމަށާ އެ ސަރަހައްދު ހިމާޔަތްކުރުމާ ގުޅޭގޮތުން އެ މިނިސްޓްރީން އުންމީދީ މަސައްކަތްތަކެއް ކުރައްވާ ކަމަށް އެ ދުވަހު ވިދާޅުވިކަން ފާހަގަ ކުރައްވާފައެވެ.
އެހެންނަމަވެސް އޭގެ ފަހުން އަހަރަކަށްވުރެ ގިނަ ދުވަސް ވެގެން ގޮސްފައިވާއިރު، މިހާތަނަށް އަމަލީ ސިފައެއްގައި އެ މައްސަލައަށް ހައްލު ހޯދައިދިނުމަށް ސަރުކާރުން އެއްވެސް މަސައްކަތެއް ކޮށްދީފައި ނުވާކަމަށް އޭނާ ވިދާޅުވިއެވެ.
އެހެންކަމުން އެ ޖަލްސާ އަކީ އެ މައްސަލަ ސަރުކާރުގެ ސަމާލުކަމަށް ގެނައުމަށް ބޭއްވުނު ޖަލްސާއެއް ކަމަށާ، ކުރިއަށް އޮތް ތަނުގައި އެފަދަ މުހިއްމު ކަންކަމާއި ގުޅިގެން ކަމާބެހޭ ސަރަހައްދުތަކެއްގައި ޖަލްސާތައް ބާއްވަމުން ގެންދާނެކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
