ނިޝާމާ މުޙައްމަދު، މަރާލި ކަމުގެ ތުހުމަތުގައި ހައްޔަރުކޮށްފައި ހުރި، އަބޫބަކުރު ފައިސަލް ފުލުހުންގެ ގޮޅީގައި ދަން ޖެހުނު މައްސަލައިގައި ކުރީގެ ނައިބު ރައީސް ޑރ މުހައްމަދު ޖަމީލު އަހުމަދުގެ ފާޑުކިޔުން ފުލުހުންނަށް އަމާޒުކުރައްވައިފިއެވެ. 

ފައިސަލް ފުލުހުންގެ ބެލުމުގެ ދަށުގައި ހުއްޓާ ދަންޖެހުނު މައްސަލައިގައި ފުލުހުންގެ އިހުމާލެއް އޮތް ތޯ ބެލުމަށް ރައްޔިތުންގެ މަޖިލީހުގެ ގައުމީ ސަލާމާތާއި ބެހޭ ކޮމެޓީ (241 ކޮމެޓީ) އަށް ވަނީ ހުށައަޅާފައެވެ. 

އެކަމާއި ގުޅޭގޮތުން ޑރ ކުރެއްވި ޓްވީޓެއްގައި ވިދާޅުވީ މިފަހަކަށް އައިސް އަބަދުވެސް އިވެމުންދަނީ ފުލުހުންގެ އިހުމާލުގެ ވާހަކަތައް ކަމަށެވެ. ބަންދުގައި ހުއްޓާ މީހުން މަރުވުމާއި، ނުވަތަ އަމިއްލައަށް މަރުވާން މަސައްކަތް ކުރަމުންދާ ވާހަކަތަކީ އާންމު ކަމެއްކަމަށް ޑރ ޖަމީލު ވިދާޅުވިއެވެ. އަދި ވިދާޅުވީ އެއީ އާދައިގެ ކުޑަ ކަމެއް ނޫން ކަމަށެވެ. 

Advertisement

ޑރ ޖަމީލު ވިދާޅުވި ގޮތުގައި ފުލުހުންގެ ފަރާތުން ވާ އިހުމާލުގެ މައްސަލަތައް އިތުރުވަމުން ދަނީ ފުލުހުންގެ މުއައްސަސާގެ ފޯކަސް ބަދަލުވެ އެ މުއައްސަސާގައި ސިޔާސީ ކުލަ ޖެހުމުގެ ސަބަބުންނެވެ. 

އެވާހަކައާއި ގުޅުވާ ޑރ ޖަމީލު ވަނީ ފުލުހުންގެ މުއައްސަސާއަކީ ސިޔާސީ ޖަގަހައެއްކަމަށް ސިފަކުރައްވާފައެވެ. އަދި ފުލުހުން ހޭލާ ގާނޫނީ ޒިންމާތައް އަދާކުރާނީ އިހުމާލުގެ ކިތައް މައްސަލަ ފެންމަތިވުމުންތޯ އައްސަވާ ޑރ ޖަމީލު ވަނީ ސުވާލުވެސް ކުރައްވާފައެވެ.

ކުޅުދުއްފުށީ ޕޮލިސް ސްޓޭޝަންގެ ގޮޅިއެއްގައި 15 ދުވަހަށް ބަންދު ކޮށްފައި ހުރި ފައިސަލް ދަންޖެހިފައި ހުއްޓައި ފެނިފައިވާއިރު، މި ހާދިސާ އާ ގުޅިގެން ފުލުހުންގެ އިހުމާލު ފާހަގަކޮށް ގިނަ ބަޔަކު އަންނަނީ ސޯޝަލް މީޑިއާގައި ނުރުހުން ފާޅުކުރަމުންނެވެ.