2018 ވަނަ އަހަރުގެ ރިޔާސީ އިންތިޚާބުގައި ކުޅުނު 'މަރު' ކާޑު އެހެން ލެވެލްއެއްގައި ކުޅެން ފަށައިފި ކަމަށް ޕީޕީއެމްގެ ނައިބުރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ވިދާޅުވެއްޖެއެވެ. 

ޝިޔާމް މިފަދައިން ވިދާޅުވެފައި މިވަނީ، ރިޟްވާން ރަހީނުކޮށް މަރައިލި މައްސަލައިގައި މަރު ކޮމިޝަނުން އިއްޔެ ބޭއްވި ނޫސްވެރިންގެ ބައްދަލުވުމުގައި، ރިޟްވާނު މަރައިލުމުގައި އެންމެ އިސްކޮށް ހަރަކާތްތެރިވި މީހުންނާއި ރައީސް ޔާމީންގެ ސަރުކާރުގެ އިސް ބޭފުޅުންނާ ވަރަށް ގާތް ގުޅުމެއް އޮންނަކަމަށް ތަޙްޤީޤަށް ފާހަގަކުރެވިފައިވާ ކަމަށް ބުނުމާއި ގުޅިގެންނެވެ.

އެގޮތުން، އެ ބައްދަލުވުމުގައި މަރުކޮމިޝަނުގެ މެންބަރު މިސްބާޙު ވަނީ، ރިޟްވާން މަރާލި މައްސަލައިގައި ތުުހުމަތުކުރެވޭ ތ.އޮމަދޫ ނަރުގިސްވިލާ މުޙައްމަދު މުނާޒް ސީރިއާއަށް ފުރުވާލުމުގައި ރައީސް ޔާމީންގެ އަތެއް ވާކަމަށް ވިދާޅުވެފައެވެ. 

Advertisement

މި ވާހަކަތަކާއި ގުޅިގެން ޝިޔާމު ކުރެއްވި ޓުވީޓުގައި ވިދާޅުވި، 2018 ވަނަ އަހަރުގެ އިންތިޚާބުގައި ރައީސް ޞާލިޙު ކުޅުއްވި "މަރު" ކާޑު އެހެން ލެވެލެއްގައި ޤާނޫނު އަސާސީގެ 115 ވަނަ މާއްދާއިން ރައީސަށް ލިބިދޭ ބާރުތަކުން އަމިއްލައަށް ވުޖޫދުކުރެއްވި މަރު ކޮމިޝަން ބޭނުންކޮށްގެން 2023 ވަނަ އަހަރުގައި ކުޅުއްވުމުގެ މަސައްކަތް ރަސްމީކޮށް އިއްޔެ ފެއްޓެވީ ކަމަށެވެ.

އެއާއެކު ޝިޔާމް ވިދާޅުވީ މިފަދައިން ރައްޔިތުންނަށް އޮޅުވައިލެވޭނީ ވަކި މިންވަރަކަށް ކަމަށާ އަދި މިހާރު ރައްޔިތުން ތިބީ ހޭލާކަމަށެވެ. 

2018 ވަނަ އަހަރު ވެރިކަމަށް ވަޑައިގަތުމަށް އެންމެ ބޮޑަށް ރައީސް ޞާލިޙު ދެއްކެވި ވާހަކަފުޅަކީ މަރުތަކުގެ ވާހަކައެވެ. އެގޮތުން ރައީސް ޔާމީނުގެ އިސްތަށިފުޅުގައި ރިޟްވާނުގެ މަރާއި ޑރ.އަފްރާޝީމް ޢަލީ ޝަހީދުކޮށްލުން އަޅުވައިގެން އެއިރުގެ އިދިކޮޅު ފަރާތްތަކުން ވަރަށް ގިނަ ވާހަކަތައް ފެތުރިއެވެ.

ރައީސް ޞާލިޙުގެ ވެރިކަމުގެ ކުރީ ކޮޅުގައި ރިޟްވާނާއި ޔާމީން ރަޝީދަށް އިންސާފު ހޯއްދަވައިދެއްވާނެ ކަމަށް އެމަނުކުފާނު ވަނީ ވައުދުވެވަޑައިގެންފައެވެ. އެހެންނަމަވެސް، އެކަމަށް މަރުކޮމިޝަނުން އުފެއްދި ފުރަތަަމަ ރިޕޯޓްވެސް ހުށަހެޅުނީ އޭގެ އަހަރަކަށްވުރެ ފަހުންނެވެ. އެއަށްފަހު، ދައުރު ހަމަވާން ކައިވެފައިވަނިކޮށް އަލުން އެފަދަ ރިޕޯޓެއް އެކުލަވާލައްވައި، މަރުތަކާއި ރައީސް ޔާމީނާއި ގުޅުވީ ސިޔާސީ ބޭނުމަށް ކަމަށް އިދިކޮޅުން ބުނެއެވެ.