ގުޅިފަޅުގައި ހުންނަ ވިލިމާލެ ބްރިޖް މަސައްކަތްކުރާ މީހުންގެ އެކެމަޑޭޝަން ބްލޮކުގައި ރޭ ހިނގި އަލިފާނުގެ ހާދިސާގައި އަނިޔާވި މީހުންގެ ތެރެއިން 70 އަށްވުރެ ގިނަ މީހުންނަށް ފަރު ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ބުނެފިއެވެ.
މި ހާދިސާއާއި ގުޅިގެން އެމްއެންޑީއެފުން މިއަދު ބުނީ، މި ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ލިބުނީ ދަންވަރު 00:31 ހާއިރު ކަމަށާ އަދި ހާދިސާގެ ރިޕޯޓް ލިބުމާއެކު އެފްއާރުއެސްގެ ފަޔަރމަނުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައިވާ ކަމަށެވެ.
މިގޮތުން އެފްއާރުއެސްގެ ފަޔަރމަނުން ކުރި މަސައްކަތުން އެތަނުގައި ރޯވި އަލިފާން ނިއްވާލެވިފައި ވަނީ 01:52 ހާއިރު ކަމަށާ، އަލިފާނުގެ ޙާދިސާގައި އެކެމަޑޭޝަން ބްލޮކްވަނީ އެއްކޮށް އަނދާހުލިވެފައި ކަމަށްވެސް އެމްއެންޑީއެފުން ބުނެއެވެ.
މި އެކެމަޑޭޝަން ބްލޮގުގައި 465 މީހުން ދިރިއުޅޭކަމަށް އެމްއެންޑީއެފަށް މަޢުލޫމާތު ލިބިފައިވާކަމަށް ވެސް އެ އިދާރާއިން ބުނެއެވެ.
މި ޙާދިސާގައި އަނިޔާވި މީހުންގެ މައުލޫމާތު ހިއްސާކުރަމުން ދިވެހި ފުލުހުންގެ ޚިދުމަތުން ބުނީ، އަނިޔާވި މީހުންގެ ތެރެއިން 13 މީހަކު އައިޖީއެމްއެޗް ހޮސްޕިޓަލަށް އަދި 63 މީހުން ހުޅުމާލޭގައި ހުންނަ ޓްރީޓޮޕް ހޮސްޕިޓަލަށް ގެންދެވިފައިވާ ކަމަށެވެ. އަދި އެމީހުންގެ ތެރޭގައި ސީރިއަސް އަނިޔާވެފައިވާ 6 މީހަކު ހިމެނޭ ކަމަށްވެސް ފުލުހުން ބުނެފައިވެއެވެ.
މިހާދިސާ ހިނގައިދިޔަ ސަބަބު އަދި ސާފުވެފައި ނުވާއިރު, މި ކަމަށާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުނެފައިވެއެވެ.
Advertisement
This content is created and paid for by advertisers and does not involve Voice Journalists
