ރައްޔިތުންގެ މަޖިލީހުގެ ރައީސް އަދި އެމްޑިޕީގެ ރައީސް، މުހައްމަދު ނަޝީދު އެމްޑީޕީގެ ރިޔާސީ ޕްރައިމަރީގައި ވާދަނުކުރައްވާނެ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑިސީ) ގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ވިދާޅުވެއްޖެއެވެ.

މޫކޭ މިފަދައިން ވިދާޅުވީ، އަންނަ ޖަނަވަރީ މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވާނެކަން އެމްޑީޕީން މިއަދު އިއުލާން ކޮށްފައިވާއިރު، ޕްރައިމަރީ ގައި ވާދަކުރުމަށް ފޯމު ހުށަހެޅުމަށް އެކަށީގެންވާ ވަގުތު ދީފައިނުވާ ކަަމަށް ވިދާޅުވެ، އެކަމާއި މެދު ނުރުހުން ފާޅުކުރައްވައި މެދު ހެންވޭރު ދާއިރާގެ މެންބަރު އަލީ އާޒިމް ކުރެއްވި ޓުވީޓަކަށް ރައްދު ދެއްވަމުންނެވެ. 

އެގޮތުން މޫކޭ ކުރެއްވި ޓްވީޓްގައި ވިދާޅުވީ، ކިތަންމެ ވަރަކަށް ބޭނުން ވިޔަސް ރައީސް ނަޝީދު އެ އިންތިޚާބުގައި ވާދަ ނުކުރައްވާނެ ކަމަށެވެ.

Advertisement

"ތިއީ ދުނިޔޭގެ ކުރިމަތީ ރައީސް ނަޝީދު ބޭޒާރު ކުރާނެ ގޮތެއް ނޭނގިގެން އުޅޭ ބައެއްކަން ރައީސް ދެނެލައްވާ. މޮޅުވާނެ އެއްވެސް މަސައްކަތެއް ނުކޮށް ފިތުނައިގެ ޓްވީޓް ކޮށްގެން މޮޅެއް ނުވާނެ." މޫކޭ ވިދާޅުވިއެވެ. 

މޫކޭ މިފަދައިން ވިދާޅުވެފައި ވީ ނަމަވެސް، އެމްޑީޕީގެ ޕްރައިމަރީގައި ރައީސް ނަޝީދާއި، ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ވެސް ބައިވެރިވެ ވަޑައިގަންނަވާނެ ކަމަށް ވަނީ އެ ދެބޭފުޅުން ވަނީ އިއުލާން ކުރައްވާފައެވެ. އެކަމާއި ގުޅިގެން ޕާޓީ ދެ ފެކްޝަނަކަށް ބެހިގެން ގޮސްފައި ވާއިރު, މޫކޭ އަކީ ރައީސް ޞާލިހުގެ ފެކްޝަނުގެ މެންބަރެކެވެ.