ފަލަސްތީނު މައްސަލާގައި ފާޑުކިޔުންތައް އަމާޒުވި އެޑް ޝީރަންގެ ދެ ކޮންސެޓެއް އެންމެފަހުން ކެންސަލްކުރަން ޖެހިއްޖެއެވެ.

ރިޕޯޓްތައް ބުނެާގޮތުގައި އެމެރިކާގެ މެސެޗޫސެޓްސްގައި ހުކުރު އަދި ހޮނިހިރު ދުވަހު ބާއްވަން ތާވަލުކުރި ކޮންސެޓްތައް ކެންސަލުކުރަން ޖެހުނީ މޫސުން ގޯސްވެގެންނެވެ. 

ގިލެޓް ސްޓޭޑިއަމުން ނެރުނު ބަޔާނެއްގައި ބުނެފައިވާ ގޮތުގައި ކޮންސެޓުތައް ކެންސަލްކުރީ ސަރަޙައްދީ އިދާރާތަކާ މަޝްވަރާކުރުމަށް ފަހު ފޭނުންނާއި މުވައްޒަފުންނާއި ޝޯގައި ބައިވެރިވާ އެންމެންގެ ސަލާމަތަށް އިސްކަން ދީގެންނެވެ. ޓިކެޓްމާސްޓާ މެދުވެރިކޮށް ޓިކެޓު ގަތް ފަރާތްތަކަށް އޮޓޮމެޓިކުން ރީފަންޑް ލިބޭނެ ކަމަށާއި އެ ނޫން ގޮތްގޮތުން ގަތް ފަރާތްތަކަށް ގަތް ތަނުން ރީފަންޑް ނެގޭނެ ކަމަށް އެ ބަޔާނުގައި ބުނެފައިވެއެވެ.

ޝީރަންގެ މި ޓުއާ ފާއިތުވި ދުވަސްތަކުގައި ބޮޑެތި ޚިޔާލު ތަފާތުވުންތަކެއްގެ ތެރެއަށް ވެއްޓިފައިވެއެވެ. ސަޕޯޓް އެކްޓެއްގެ ގޮތުގައި ހަރަކާތްތެރިވަމުން ދިޔަ މެކެލްމޯ ސްޓޭޖުގައި ފަލަސްޠީނަށް ތާއީދުކޮށް ވާހަކަ ދެއްކުމުން ގިލެޓް ސްޓޭޑިއަމްގެ ވެރިޔާ ރޮބާޓް ކްރާފްޓް ހިމެނޭ ގޮތަށް ސްޓޭޑިއަމް ވެރީން ވަނީ މެކެލްމޯ ޝޯއިން ބޭރުކޮށްފައެވެ. މެކެލްމޯ ބޭރުކުރުމާ ގުޅިގެން ޝީރަންގެ އެހެން ސަޕޯޓް އާޓިސްޓުން ވެސް ވަނީ ޝޯއިން ވަކިވާން ނިންމާފައެވެ. މި މައްސަލައިގައި ޚިޔާލު ފާޅުކުރުމުގެ މިނިވަންކަމާއި މިއުޒިކާ ސިޔާސީ ވާހަކަތައް މައްސުނިކުރުމާ ބެހޭ ގޮތުން ބޮޑު ބަހުސެއް ވަނީ އުފެދިފައެވެ.

މިދިޔަ ހަފުތާ ބަންދުގައި އެނބުރި ސްޓޭޖަށް އެރި ވަގުތު ޝީރަން ފޭނުންނާ މުޚާޠަބުކޮށް ވަނީ މެކްލެމޯ ޝޯއިން ބޭރުކުރި މައްސަލާގައި އޭނާ މައާފަށް އެދޭކަމަށް ބުނެފައެވެ.

އެޑް ޝީރަންއާ އެކު އޮތް ފުރުޞަތު ގެއްލުމުން، ފަލަސްޠީނަށް އެހީވުމަށް މެކްލެމޯ މިހާރު ދަނީ ފަލަސްތީނަށް އެހީވުމަށް ހާއްސަ ޝޯއެއް ދިނުމަށް ތައްޔާރުވަމުންނެވެ. މި ޝޯ ބޭއްވުމުގެ ކަންކަން ވަރަށް ބާރަށް ކުރިއަށްދާަކަމަސް އޭނާ ވަނީ ބުނެފައެވެ.