ހުކުރު ދުވަހަކީ ޚާއްސަ ދުވަހަކަށްވާއިރު، އެކި ހުކުރު އެކި ކަހަލަ ކެއުންތަކަށް ސުފުރާމަތި ޚާއްސަކޮށްލާ ގެތައްވެސް މަދެއް ނުވާނެއެވެ. މިއަދު 'ވޮއިސް'ގެ ބަދިގެއިން މި ގެނެސްދެނީ، ދިވެހި ކެއުންތަކަށް ލޯބިކުރާ މީހުންގެ މެދުގައި އެންމެ މަގުބޫލު އެއް ޑިޝް ކަމަށްވާ ރިހާކުރު ދިޔަ ތައްޔާރުކުރާނެ ގޮތެވެ. ރިހާކުރު ދިޔަ އަކީ، ބަނބުކެޔޮ ބަތާއި، ބަރަބޯ ބަތް އަދި އާދައިގެ ބަތުގެ އިތުރުން ހުނި ރޮށްޓާއި އެކު ކާލަންވެސް އެއްވަނައިގެ އެއްޗެކެވެ. 

6 މޭޒުމަތީ ސަމުސާ ރިހާކުރު

2 ޖޯޑު ކާށި ކިރު

ހިކަނދިފަތް

2 ފިޔާ

1 ލުނބޯ

5 ފޮޅިކޮށްފައިވާ ހިކިމިރުސް (ނޫނީ ބޭނުން ވަރަކަށް)

 ލޮނު

1. ފިޔައާއި، ހިކަނދިފަތާއި، ހިކިމިރުސްތައް ކުދިކޮށް ތުނިކޮށް ކޮށާށެވެ. 

2. ދެން ބޯތަށްޓަކަށް ފިޔާކޮޅާއި ހިކަނދިފަތްކޮޅު އެޅުމަށްފަހު ލުނބޯހުތްކޮޅާއި ލޮނު ކޮޅެއް ލައިގެން ރަނގަޅަށް އަތުން މޮޑެލާށެވެ.

3. އެއަށްފަހު ހިކި މިރުހާއި ރިހާކުރާއި އެޅުމަށްފަހު ވެސް ރަނގަޅަށް މޮޑެލާށެވެ. ދެން ކާށިކިރުކޮޅު އަޅާލާފައި ރަނގަޅަށް އެއްކޮށްލާށެވެ.

4. ރަހަބަލާލާފައި ލޮނުރަހަ މަޑު ނަމަ ލޮނުކޮޅެއް އަޅާލާށެވެ. އަދި ރިހާކުރު މަދު ހެން ހީވާ ނަމަ އިތުރު ސަމްސަލެއްގެ ރިހާކުރުވެސް އަޅާލައި، އެހެން ރަހައެއް ހެޔޮވަރުކޮށްލަން ބޭނުންނަމަ އެކަންވެސް ކޮށްލާށެވެ.