ޖަލަށް ދާން ޖެހުނަސް އަޑު ކަނޑުވާ ނުލެވޭނެ ކަމަށް ކުރީގެ ރައީސް އަދި ޕީޕީއެމްގެ ރިޔާސީ ކެންޑިޑޭޓް ޔާމީން އަބްދުލްގައްޔޫމު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ އިދިކޮޅުން ކާނިވާ ސަރަހައްދުގައި ރޭ ބޭއްވި "ފެލާލައިފި" ޖަލްސާގައި ވާހަކަ ދައްކަވަމުންނެވެ.

ޔާމީން ވިދާޅުވީ، ޖަލަށް ލިޔަސް އެމަނިކުފާނުގެ އަޑު ކަނޑުވާ ނުލެވޭނެ ކަމަށާއި އެމަނިކުފާނުގެ ވިސްނުމެއްވެސް ބަދަލެއް ނުވާނެ ކަމަށެވެ.

Advertisement

"މިވަގުތު ދުނިޔޭގައި ތިބި އިސްލާމުންނާ އެންމެ އަދާވާތްތެރި، އެންމެ ހަތުރުވެރި، އެންމެ ނަފުރަތު، އެންމެ އަނިޔާ ކުރާ ބަޔަކީވެސް ހިންދޫ، މިހާރު މިތިބަ އާރުއެސްއެސްއާ ބީޖޭޕީ. އެހެންމަ އަޅުގަނޑު މި ވާހަކަ ދައްކާތީތޯ މޯދީ އަށް ކަމު ނުދަނީ. މޯދީއަށް ކަމު ނުދިޔަސް އަޅުގަނޑު ބުނާނީ ހަމަ އިންޑިޔާ ޖެހޭނީ ފައިބާށޭ،" ޔާމީން ވިދާޅުވިއެވެ.

ގާނޫނު އަސާސީން ލިބިދޭ އެއްވެ އުޅުމާ، ހިޔާލު ފާޅުކުރުން ލިބިދޭ ކަމަށާއި އެމަނިކުފާނުގެ ހިޔާލުތަކާއި ޝުއޫރުތައް ހިފަހައްޓާނީ ކިހިނެތްތޯ ޔާމީން ވަނީ ސުވާލު ކުރައްވާފައެވެ.

"ޖަލަށް ދާން ޖެހިދާނެ. މޯދީ ހިތްހަމަ ނުޖެހެންޏާ މާދަން ނޫން އަނެއް ދުވަހުވެސް ޖަލަށް ދާނަން. އެކަމަކު ރައީސް ޔާމީނުގެ އަޑެއް ކަނޑުވައެއް ނުލެވޭނެ. ރައީސް ޔާމީނުގެ ވިސްނުމަކަށް ބަދަލެއް ނާންނާނެ. ރައީސް ޔާމީނުގެ އަޒުމަކަށް ބަދަލެއް ނާންނާނެ،" ޖޯޝާއެކު ވާހަކަ ދައްކަވަމުން ޔާމީން ވިދާޅުވިއެވެ.

ރައީސް ޔާމީން މިފަދައިން ވިދާޅުވެފައި މިވަނީ މާދަމާ އެމަނިކުފާނުގެ މައްޗައް އާރަށުގެ މައްސަލާގައި ހުުކުމް ކުރަން ހަމަޖެހިފައިވާ މައްސަލައާއި ގުޅުވައިގެންކަން ފާހަގަކޮށްލަންޖެހެއެވެ.

އިންޑިޔާއިން ކިތައްމެ ރުޅި އަޔަސް، އިންޑިޔާއިން މިހާރު ކުރަމުންދާ ކަންކަމާމެދު ނަފްރަތު ކުރާކަމަށް ޔާމީން ވިދާޅުވިއެވެ.

މީގެ އިތުރުން ޔާމީން ވިދާޅުވީ، އިންޑިޔާއިން ދޭ ލޯނަކީ ރައްޔިތުންނަށް ހެޔޮގޮތުގަ ބޭނުން ހިފޭ ލޯނެއް ނޫން ކަމަށާއި އޭގެން ހިންގަނީ ތަރައްގީގެ މަޝްރޫއުތައް ނޫން ކަމަށެވެ. އަދި އޭގެން ބައި އަޅައިގެން ސަރުކާރުގެ ތެރެއިން ބޭނުން ކުރާ ކަމަށްވެސް ޔާމީން ތުހުމަތު ކުރެއްވިއެވެ.