މި ހަފްތާއިން ފެށިގެން 'ދާރިސް' ޓީވީގެ ސިގްނަލް މީޑިއާ ނެޓަށް ލިބޭނެ ކަމަށް އެ ޓީވީއިން ބުނެފިއެވެ.
ދާރިސް ޓީވީގެ ސިގްނަލް ލިބޭނީ މީޑިއާނެޓްގެ 131 ވަނަ ޗެނަލްއިންނެވެ. މީގެކުރިން އެ ޓީވީ ދައްކަމުން އައީ ހަމައެކަނި ދިރާގު ޓީވީގެ 13 ވަނަ ޗެނަލުންނެވެ.
ރާއްޖޭގެ ބައެއް ދީނީ އިލްމުވެރިން އިސްނަންގަވައިގެން "ދާރިސް"ގެ ނަމުގައި ޓީވީ ޗެނަލް އިފްތިތާހު ކޮށްފައިވަނީ މި އަހަރުގެ އޮކްޓޯބަރ މަހުގެ ތެރޭގައެވެ.
މި ޗެނަލް ހިންގަނީ ދީނީ އިލްމުވެރިން ހިމެނޭ އެޑްވައިޒަރީ ބޯޑަކުންނެވެ. މި ބޯޑުގެ ޗެއާމަނަކީ ޑރ. އަލީ ޒާހިރު ބިން ސައީދު ޤާސިމެވެ. އޭގެ އިތުރުން ބޯޑުގައި ތިއްބަވާނީ ޖަމްޢިއްޔަތުއް ސަލަފްގެ ރައީސް އައްޝައިޚު އަބްދުﷲ މުޙައްމަދު އަދި ޝައިޚު އަޙްމަދު ސަމީރެވެ.
ދާރިސް ޓީވީން ދައްކަން ނިންމާފައިވާ ބައެއް ކަހަލަ ޕްރޮގްރާމްތަކުގެ ތެރޭގައި ޚަބަރާއި ކުޅިވަރާއި ކަސްރަތާއި ސިއްހަތުގެ އިތުރުން ކައްކާ ޕްރޮގްރާމް ފަދަ ޕްރޮގްރާމްތައް ހިމެނެއެވެ.
"ދާރިސް" ޓީވީގެ ނަމުގައި މި ޗެނަލް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ޑރ. އަލީ ޒާހިރު ވިދާޅުވީ ދާރިސް ޓީވީގެ މަގުސަދަކީ ކުރިއަށް އޮތް ތަނުގައި ރާއްޖޭގެ ގިނަ ބައެއްގެ މެދުގައި އެންމެ މަގުބޫލު ޗެނަލަށް ހެދުން ކަމަށެވެ.
އޮކްޓޯބަރ 15 ވަނަ ދުވަހު ރަސްމީކޮށް އެ ޗެނަލް އިފްތިތާހު ކުރި ނަމަވެސް, އޮކްޓޯބަރ 10 ވަނަ ދުވަހު ވަނީ އެ ޗެނަލުގެ ހިދުމަތް އާއްމުކޮށް ދޭން ފަށާފައެވެ.
މިވަގުތު އެ ޗެނަލް ދައްކަމުން އަންނަނީ ހަވީރު ހަތަރަކުން ފެށިގެން ރޭގަނޑު 10:30 އާ ހަމައަށެވެ.
Advertisement
This content is created and paid for by advertisers and does not involve Voice Journalists
