ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރ ޝިމާޒު އަލީ ޔޫތު މިނިސްޓްރީއަށް ބަދަލުކޮށްފިއެވެ.
ޓްރާންސްޕޯޓު މިނިސްޓަރު ޢާއިޝަތު ނަހުލާއާ ބޮޑެތި މައްސަލަތަކެއް ޖެހިފައިވާ ދަނޑިވަޅެއްގައި، ޝިމާޒު ޔޫތު މިނިސްޓްރީއަށް ބަދަލު ކުރުމާ ގުޅިގެން ރައީސް އޮފީހާ ސުވާލު ކުރުމުން ބުނެފައި ވަނީ، މިއީ ވަކި ސަބަބެއް އޮވެގެން ގެނައި ބަދަލެއް ނޫން ކަމަށެވެ.
ނަމަވެސް ޓްރާންސްޕޯޓު މިނިސްޓަރު ނަހުލާ ވަނީ ކޮރަޕްޝަންގެ ބޮޑެތި ތުހުމަތު ތަކެއް ޝިމާޒުއަށް ކޮށްފައެވެ. އަދި އޭނާ މަގާމުން ވަކިކުރުމަށް ނަހުލާ އެދުމާއި ގުޅިގެން އެ ދެބޭފުޅުންގެ ދެމެދުގައި މީގެ ކުރިން ވަނީ މައްސަލަ ތަކެއް ޖެހިފައެވެ.
ޝިމާޒާއި މިނިސްޓަރު ނަހުލާގެ ގުޅުން ގޯސްވެ ޝިމާޒު މަޤާމުން ވަކިކޮށްދިނުން އެދިވަޑައިގެން ނަހުލާވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އަރިހަށް ފޮނުއްވި ސިޓީގައި ޝިމާޒު މަޤާމުގެ ނުފޫޒު ނަހަމަ ގޮތުގައި ބޭނުންކުރައްވައިގެން ކޮރަޕްޝަނުގެ ގިނަ އަމަލުތަކެއް ހިންގަވާފައިވާ ކަމުގެ ހެކި ލިބިފައިވާކަމަށް ނަހުލާ ވަނީ ވިދާޅުވެފައެވެ.
އެގޮތުން، ޤަވާއިދާ ޚިލާފަށް އެއްގަމު އުޅަނދު ރަޖިސްޓަރީކޮށްދީގެން އަމިއްލައަށް ބޮޑެތި މަންފާތަކެއް ޝިމާޒު ހޯއްދަވަމުން ގެންދާކަމަށް ތުހުމަތުކުރައްވާފައިވާއިރު, ޤަވާއިދާ ޚިލާފަށް ދޫކޮށްފައިވާ ރަޖިސްޓަރީތަކުގައި ސޮއިކުރެއްވީ ޝިމާޒު ކަމަށްވެސް ނަހުލާ ވިދާޅުވެފައިވެއެވެ.
Advertisement
This content is created and paid for by advertisers and does not involve Voice Journalists
