ސ.ހިތަދޫ ކޯޓުގެ މެޖިސްޓްރޭޓް ރަފީޢުއްދީން އަޙްމަދުގެ ސުލޫކީ މައްސަލައެއް ބެލުމަށް ޖުޑީޝަލް ސަރވިސް ކޮމިޝަން (ޖޭއެސްސީ)އިން ނިންމައިފިއެވެ.

ޖޭއެސްސީން ބުނި ގޮތުގައި، މި މައްސަލައަކީ، އަވަސް ނިޔާގެ ޙުކުމް ކުރަންޖެހޭ މައްސަލައެއްގައި، ޖިނާއީ އިޖުރާއަތުގެ ޤާނޫނާ ޚިލާފަށް މައްސަލައިގެ ޙުކުމް ކޮށްފައިނުވާކަމަށްބުނެ ހުށަހެޅިފައިވަ މައްސަލައެއް ކަމަށެވެ.

އެހެންކަމުން، މި މައްސަލަ ތަޙްޤީޤުކުރުމަށް، މިދިޔަ ބުދަ ދުވަހު ބޭއްވި ޖުޑީޝަލް ސަރވިސް ކޮމިޝަނުގެ 91 ވަނަ ޖަލްސާއިން ވަނީ ކޮމިޓީ އެކުލަވާލެވިފައި ކަމަށް އެ ކޮމިޝަނުން ބުންޏެވެ.

Advertisement

"ޖިނާއީ އިޖުރާއަތުގެ ޤާނޫނުގެ 151 ވަނަ މާއްދާގެ (ބ) އާ ޚިލާފަށް މައްސަލައިގެ ޙުކުމް ކޮށްފައިނުވާކަމަށްބުނެ ސ.ހިތަދޫ މެޖިސްޓްރޭޓް ކޯޓުގެ މެޖިސްޓްރޭޓް ރަފީޢުއްދީން އަޙްމަދާ ގުޅޭގޮތުން ހުށަހެޅުނު މައްސަލަ ތަޙްޤީޤުކުރުމަށް ނިންމުމާ ގުޅިގެން މި މައްސަލަ ތަޙްޤީޤުކުރުމަށް 2022 ޑިސެމްބަރު 21 ވީ ބުދަ ދުވަހު ބޭއްވި ޖުޑީޝަލް ސަރވިސް ކޮމިޝަނުގެ 91 ވަނަ ޖަލްސާއިން ވަނީ ކޮމިޓީ އެކުލަވާލެވިފައި" ޖޭއެސްސީން ބުންޏެވެ.