އަންނަ އަހަރުގެ ރިޔާސީ އިންތިހާބުގައި މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ފަރާތުން ވާދަކުރާނެ ފަރާތެއް ކަނޑައެޅުމަށްޓަކައި ބާއްވާ ޕްރައިމަރީ ބޮޑުތަނުން ކާމިޔާބު ކުރައްވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވީ، މިއަދު ހަވީރު ރައީސް އޮފީހުގައި ނޫސްވެރިންނާ ބައްދަލުކޮށް ވާހަކަ ދައްކަވަމުންނެވެ.

ރިޔާސީ އިންތިހާބު ކާމިޔާބު ކުރުމާ ބެހޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ޞާލިހު ވިދާޅުވީ، އެންމެ ފުރަތަމަ މަސައްކަތް ކުރައްވަނީ ޕާޓީގެ އެތެރޭގެ އިންތިހާބު ކާމިޔާބު ކުރެއްވުމަށް ކަމަށެވެ.

ރައީސް ޞާލިހު މިހެން ވިދާޅުވެފައި ވާއިރު، އެމަނިކުފާނާ ވާދަ ކުރައްވާ ކެނޑިޑޭޓް، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ވިދާޅުވެފައި ވަނީ، ޕްރައިމަރީއިން މޮޅުވާނެކަމުގެ ޔަގީންކަން އެބައޮތް ކަމަށެވެ.

ނަޝީދު މިހެން ވިދާޅުވީ، އެމަނިކުފާނުގެ ކެމްޕޭން ޓީމާ ބައްދަލު ކުރައްވައި ދެއްކެވި ވާހަކަފުޅުގައެވެ.

އަންނަ ޖަނަވަރީ މަހުގެ 28 ވަނަ ދުވަހުގައި އެމްޑީޕީގެ ރިޔާސި ކެނޑިޑޭޓު ކަނޑައެޅުމަށް ރިޔާސީ ޕްރައިމަރީ ބާއްވާނެކަން އެމްޑީޕީން މިމަހު 18 ވަނަ ދުވަހު އިއުލާން ކުރުމާއިއެކު، ރައީސް ނަޝީދު ވަނީ އެމަނިކުފާނު ޕްރައިމަރީގައި ވާދަކުރައްވާނެކަން ޔަގީންކޮށްދެއްވާފައެވެ. އަދި އެކަމުގައި އެމަނިކުފާނަށް ތާއީދު ކުރެއްވުމަށް އެމްޑީޕީގެ އެންމެހައި މެމްބަރުންގެ ކިބައިން ވަނީ އެދިވަޑައިގެންފައެވެ. އަދި ރައީސް ޞާލިހު ވަނީ20 ހާސް ތާއީދު ސޮޔާއެކު ކެޑިޑެންސީ ފޯމު ހުށަހަޅައިފައެވެ.