ކުރިއަށް އޮތް އެމްޑީޕީގެ ރިޔާސީ ޕްރައިމަރީ ގައި، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ ފަހަތްޕުޅުގައި ހުންނެވުމުން މަލާމާތާއި ފުރައްސާރަ ކުރި ނަމަވެސް، އެ އިންތިހާބުގައި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ގެ ފަހަތްޕުޅަށް ނާރާނެ ކަމަށް އާރްޑީސީގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) ވިދާޅުވެއްޖެއެވެ.
މިހާރު ކުރިއަށްދާ "އިބޫ 2023" ކެންޕެއިން ހަރުގެ ޖަލްސާގައި ވާހަކަ ދައްކަވަމުން މޫކޭ ވިދާޅުވީ، ރައީސް ނަޝީދު އަކީ ވަރަށް ލޯބިވާ ބޭފުޅެއް ކަމަށާ އެހެންކަމުން އެމަނިކުފާނަށް ރައްދު ދެއްވުމަކީ ވަރަށް އުދަނގޫ ކަމެއް ކަމަށެވެ.
އެހެންނަމަވެސް، މިވަގުތު ނަޝީދަކީ ރައީސް ޞާލިހަށް ތާއީދުކުރާ މެންބަރުންގެ ވާދަވެރި ކެންޑިޑޭޓް ކަމަށާ، އަދި އިދިކޮޅު ކެންޑިޑޭޓެއްގެ ގޮތުގައި ހުންނަވައިގެން އެމަނިކުފާނު އަންނަނީ ރައީސް ޞާލިހުގެ ފެކްޝަނަކަށް ހިތުހުރި އެއްޗެއް ކިޔުއްވަމުން ކަމަށް އޭނާ ވިދާޅުވި އެވެ.
މިއާއެކު މޫކޭ ވަނީ ރޭގައި އޮތް ރައީސް ނަޝީދު ގެ ކެންޕެއިން ޖަލްސާގައި އެމަނިކުފާނު ދެއްކެވި މައިގަނޑު ތިން ވާހަކަ އަކަށް ރައްދުދެއްވާފައެވެ. އެގޮތުން، ފުރަތަމަ ކަމަކަށް އޭނާ ފާހަގަކުރެއްވީ އެމްޑީޕީ، ނަޝީދުގެ އަތުން އަތުލައިފި ކަމަށް ވިދާޅުވި ކަމަށް ދެއްކެވި ވާހަކަފުޅެވެ. އެވާހަކައަށް ރައްދު ދެއްވައި މޫކޭ ވިދާޅުވީ އެ ޕާޓީ އަތުލަން ކުރި އެއްވެސް ކަމެއް ނޯންނާނެ ކަމަށް، އެހެން ނަމަވެސް، ރައީސް ނަޝީދު ގެ ފެކްޝަން ދޫކޮށް ރައީސް ޞާލިހުގެ ފެކްޝަނާއި ގުޅޭ އެންމެހައި މެންބަރުންނަށް ވެސް ނަޝީދުގެ ފެކްޝަނުން މަލާމާތްކޮށް ތުހުމަތު ތައް ކުރައްވާކަމަށެވެ.
"ވެގެން މިއުޅޭ ގޮތަކީ، މި ވީ ކުރުމުއްދަތުގެ ތެރޭގައި އަޅުގަނޑުމެންގެ ހިތުގައި ރައީސް ޞާލިހާއި މެދު ލޯބި ޖެހުނީ. ދެވަނަ ކަމެއް ވެގެނެއް ނޫން. އަޅުގަނޑުމެން މިތިބީ ހަމަ ރަނގަޅަށް ވެސް ރައީސް ޞާލިހު ދެކެ ލޯބިވެފައި. ލޯބިން މިދަނީ މި މަސައްކަތާއި އެކީގައި ކުރިއަށް. އިރާދަކުރެއްވިޔާ އަޅުގަނޑުމެން ހުއްޓާލާނީ ބޮޑު ތަފާތަކުން މި އިންތިހާބު ކާމިޔާބު ކޮށްފައި." ރައީސް ނަޝީދު ދޫކޮށް ރައީސް ޞާލިހުގެ ފެކްޝަނާއި މެންބަރުން ގުޅޭ ސަބަބު ހާމަކުރައްވަމުން މޫކޭ ވިދާޅުވިއެވެ.
ރައީސް ނަޝީދު ދެއްކެވި ވާހަކަފުޅުގެ ތެރެއިން ދެވަނައަށް މޫކޭ ފާހަގަކުރެއްވީ ބަރުލަމާނީ ނިޒާމުގެ ވާހަކައެވެ. އެވާހަކައަށް ރައްދު ދެއްވަމުން ނޫކޭ ވިދާޅުވީ ނަޝީދު އެފަދައިން ވާހަކަ ދައްކަވާ ސަބަބު އެންމެނަށް އެނގޭ ކަމަށެވެ.
ތިންވަނަ ކަމަކަށް މޫކޭ ވިދާޅުވީ، އަދުގެ ސަރުކާރުން އެއްވެސް ކަމެެއް ނުކުރާ ކަމަށް ނަޝީދު ވިދާޅުވާއިރު، ސަރުކާރުގެ މަޝްރޫއު އެއް ނުހިނގާ އެއްވެސް ރަށެއް ނޯންނާނެ ކަމަށެވެ.
އަދި ރައީސް ޞާލިހު ގެ ފަހަތަށް އެމްޑީޕީގެ އެންމެ ޒަމާންވީ މެންބަރުން އަރަންޖެހުނީ، 2018 ވަނަ އަހަރު އެ ޕާޓީ ސަލާމަތް ކޮށްދެއްވީ އެމަނިކުފާނު ކަމަށާ، ޕާޓީގެ އިސް ލީޑަރަށް ވުމަށް ފަހުގައިވެސް ޕާޓީ މެންބަރުން ކަނޑާލައި، ފިޔަވަޅު އެޅުންފަދަ ކަންކަން އެމަނިކުފާނު ނުކުރައްވާ ކަމަށް މޫކޭ ވިދާޅުވިއެވެ.
"ކިތަންމެ މަލާމާތެއް ކުރިޔަސް، ހައްދަވައިގެން ހަޑިއްޔާ ހަޑި ހުރިހާ ނަމެއް އަޅުގަނޑުމެންނަށް ކިޔަސް، އަޅުގަނޑުމެންނެއް މި އިންތިޚާބަކު ރައީސް ނަޝީދު ގެ ފަހަތަކަށް ނާރާނަން. ރައީސް ޞާލިހު އިރާދަކުރެއްވިޔާ މި އިންތިހާބު ބޮޑުކޮށް ނަގާފައި ނޫނިއްޔާ އަޅުގަނޑުމެން ހުއްޓައެއް ނުލާނަން" މޫކޭ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
