އަންނަ މަހުން ފެށިގެން ޗައިނާއިން ޓޫރިސްޓުން ރާއްޖެ އަންނަން ފަށާނެ ކަމަށް ޗައިނާއިން ރާއްޖެއަށް ކަނޑައަޅާފައިވާ ސަފީރު ވަންގް ލިޒިން ވިދާޅުވެއްޖެއެވެ.
ތިން އަހަރުގެ މެދުކެނޑުމަކަށް ފަހު ޗައިނާއިން ރާއްޖެއަށް ފަތުރުވެރިން އަންނަން ފަށާއިރު، ދަތުރު ކުރުމުގައި ވަކި ގޮތްތަކެއްގެ މަތިން އެ ގައުމުގެ ރައްޔިތުންނަށް ލުއި ދޭނެ ކަމަށް ވަންގް ވިދާޅުވިއެވެ. އެހެން ނަމަވެސް ދެ ޤައުމުގެ ދެމެދުގައި ސީދާ ދަތުރުތައް ފެށުމަށް އަދި ވަގުތު ނަގާނެ ކަމަށް ބެލެވޭ ކަމަށް އޭނާ ވިދާޅުވިއެވެ.
ކޮވިޑް-19 އާ ގުޅިގެން ޗައިނާގެ ބޯޑަރު ބަންދުކޮށްފައި އޮތުމަށް، ޖެނުއަރީ މަހުގެ އަށް ވަނަ ދުވަހު އެގައުމުގެ ބޯޑަރު އަލުން ހުޅުވަން ވަނީ ނިންމާފައެވެ.
މީީޑިއާ ރިޕޯޓުތައް ބުނާ ގޮތުގައި ބޯޑަރު ހުޅުވާލުމުން ދުނިޔޭގެ އެކި ކަންކޮޅުތަކަށް ދަތުރުކުރަން ބޭނުންވެފައި ތިބި ޗައިނާ ރައްޔިތުންނާއެކު ބައެއް އެއާލައިންތަކާއި ޓްރެވަލް ވެބްސައިޓް ތަކަށް ބާރު ބޮޑުވާނެއެވެ..
ޗައިނާއަކީ ކޮވިޑްގެ ބަލިމަޑުކަމުގެ ސަބަބުން އެންމެ ފުރަތަމަ ބޯޑަރު ބަންދުކޮށް، އަދި އެންމެ ފަހުން ބޯޑަރު ހުޅުވާލާނެ ގައުމެވެ.
ކޯވިޑް19 ގެ ކުރިން ޗައިނާއަކީ ރާއްޖެއަށް އެންމެ ގިނަ ފަތުރުވެރިން އަންނަ މާކެޓެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން 2019 ވަނަ އަހަރު ޗައިނާއިން ރާއްޖެއަށް ދެ ލައްކަ ފަތުރުވެރިން ޒިޔާރަތްކޮށްފައިވެއެވެ.
Advertisement
This content is created and paid for by advertisers and does not involve Voice Journalists
