ރަސްމީ ފާލަމާއި 3 ނަންބަރު ޖެޓީ ދެމެދަށް އެޅިފައި ހުރި ކަޅު ތެޔޮތަކުގެ 40 ޕަސެންޓް ނަގާފައިވާކަމަށް އެމްއެންޑީއެފްއިން ބުނެފިއެވެ.
ރަސްމީ ފާލަމާ ދިމާލު ފަޅުތެރެއަށް އެޅިފައިވާ ގިނަ ޢަދަދެއްގެ ކަޅުތެޔޮ ނެގުމަށް އެމްއެންޑީއެފް ކޯސްޓްގާޑުން ކުރަމުންދާ މަސައްކަތް ހުއްޓުމެއް ނެތި މިއަދުވެސް ކުރަމުން ދާއިރު، އެމްއެންޑީއެފްއިން ބުނެފައި ވަނީ، އެތަނަށް 1000 ލީޓަރުގެ ތެޔޮ އެޅިފައިވާކަމަށް ލަފާ ކުރެވޭ ކަމަށެވެ. އަދި އެ ސަރަހައްދުން މިހާތަނަށް 400 ލީޓަރުގެ ތެޔޮ ނެގިފައިވާކަމަށް އެމްއެންޑީއެފްއިން މައުލޫމާތުދިނެވެ.
ރަސްމީ ފާލަމާއި 3 ނަންބަރު ޖެޓީ ދެމެދު ގިނަ އަދަދެއްގެ ކަޅުތެޔޮ އެޅިފައި ހުރިކަމުގެ މަޢުލޫމާތު އެމްއާރުސީސީއަށް ލިބިފައިވަނީ އިއްޔެ ހެނދުނު 09:10 ހާއިރުކަމަށް އެމްއެންޑީއެފުން ބުނެފައިވެއެވެ.
މިކަމާއި ގުޅިގެން އިތުރު މައުލޫމާތު ދެމުން އެމްއެންޑީއެފުން އިއްޔެ ބުނީ، ރަސްމީ ފާލަން ސަރަހައްދަށް އެޅިފައިވާ ކަޅުތެޔޮތައް ނެގުމަށް ބޫމިންގ ބޭނުންކޮށްގެން، ކޮންޓެއިންކޮށް އަދިވެސް ތެޔޮތައް ނަގަމުންދާ ކަމަށެވެ.
އަދި އޭގެ އިތުރުން، އެމްޕީއެލް ސަރަހައްދުން ފެނިފައިވާ ކަޅުތެޔޮތައް ނިޔުޓްރަލްކުރުމުގެ މަސައްކަތް ވެސް ކުރަމުންދާ ކަމަށް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
