ގއ. ދެއްވަދޫއިން މަހަށް ނުކުމެ އުޅުނިކޮށް ގެއްލުނު މީހަކު ނިޔާވެފައި އޮއްވާ ފެނިއްޖެއެވެ.

އެފަދަ ހާދިސާއެއް ހިނގައިގެން އުޅޭކަން އެރަށު ކައުންސިލުން ވަނީ ކަށަވަރު ކޮށްދީފައެވެ.

ނިޔާވެފައި އޮއްވާ ފެނުނީ، ގއ. ދެއްވަދޫ ވައިމަތީގޭ އަހުމަދު ރަޝީދު ކަމަށާ،ދޯނީގެ ފަރާތުން އެ ހާދިސާ ރިޕޯޓު ކޮށްފައި ވަނީ 9 ޖަހާކަންހާއިރު ކަމަށް ދެއްވަދޫ ކައުންސިލްގެ ރައީސް އަބްދުﷲ ޝާފިއު ވިދާޅުވިއެވެ. 

އަށާރަ މީހުންނާއެކު "މަސްކުރަނގި" ދޯނިން އެންދަމަން ދިޔައީ އެއަތޮޅު ވިލިގަލާ ކިޔާ ފަޅު ރަށަކަށް ކަމަށާއި ދޯނިން މީހަކު މަދުވެގެން އުޅޭކަން ފާހަގަ ކުރެވުމުން އެމީހާ ހޯދަން ފެށީ ކަމަށް ފަޅުވެރިންނާ ހަވާލާދީ ޝާފިއު ވިދާޅުވިއެވެ. އަދި ހޯދަމުން ދަނިކޮށް ފެނުނީ ގެއްްލުނު މީހާ ނިޔާވެފައި އޮއްވާ ކަމަށް ޝާފިއު ވިދާޅުވިއެވެ.

ޝާފިއު ވިދާޅުވީ، ނިޔާވެފައިވާ މީހާގެ ހަށިގަނޑު ފެނުނީ ވިލިގަލާގެ ބޭރުން އޮޔާ ދަނިކޮށް ކަމަށެވެ.

މިކަމާއި ގުޅިގެން މައުލޫމާތު ދެމުން، ފުލުހުން ބުނީ، ދެއްވަދޫއިން މަހަށް ނުކުތް ދޯންޏަކުން އެންދަމަން މޫދަށް ފޭބި މީހެއްގެ ހަބަރެއް ނުވެ ގެއްލިފައިވާ ކަމަށް މިއަދު 8:30 ހާއިރު އެ އިދާރާ އަށް ރިޕޯޓް ކޮށްފައިވާ ކަމަށެވެ. 

އަދި ދެއްވަދޫއާއި މޭލެއްހާ ބޭރުން ކަނޑުމަތިން އެމީހާ ފެނިގެން، އެ މީހާ ދެއްވަދޫ ސިއްހީ މަރުކަޒަށް ގެންގޮސްފައިވާ ކަމަށާ، މަރުކަޒަށް ގެންދެވުނު އިރުވެސް އެމީހާ ނިޔާވެފައިވާ ކަމަށް ސިއްހީ މަރުކަޒުން މައުލޫމާތު ދޭ ކަމަށް ފުލުހުން ބުނެފައިވެއެވެ.

މީގެ އިތުރުން ފުލުހުން ބުނީ، މި ހާދިސާގައި ނިޔާވެފައި ވަނީ 56 އަހަރުގެ ދިވެހި ފިރިހެނެއް ކަމަށާ، އެކަމާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.